Biznes, İnvestisiya və Xeyriyyəçilik İqlim Platforması çərçivəsində müzakirələr aparılıb
COP29 çərçivəsində Biznes, İnvestisiya və Xeyriyyəçilik İqlim Platformasında iqlim dəyişikliyi ilə mübarizədə effektiv maliyyə həlləri və biznes strategiyaları müzakirə olunub.
İqtisadiyyat Nazirliyinə istinadən Crossmedia.az-ın məlumatına görə, COP29 çərçivəsində COP29 Sədrliyi, COP29-un İqlim dəyişmələri üzrə yüksək səviyyəli çempionu, İqtisadiyyat Nazirliyi və İxracın və İnvestisiyaların Təşviqi Agentliyi – AZPROMO-nun təşkilatçılığı, həmçinin beynəlxalq qurumlarla tərəfdaşlıq əsasında Biznes, İnvestisiya və Xeyriyyəçilik İqlim Platforması təşkil olunub. Tədbirə 71 ölkədən 1000-dən çox qeydiyyatdan keçmiş iştirakçı qatılıb.
Tədbirdə ekologiya və təbii sərvətlər naziri, COP29-un prezidenti Muxtar Babayev və iqtisadiyyat nazirinin müavini Səməd Bəşirli çıxış ediblər. İqtisadi artımın, iqlim dayanıqlığının gücləndirilməsi üçün qlobal təşəbbüslərin təşviqi və ölkəmizin bu prosesdə mühüm rolu qeyd edilib. Dövlət və özəl sektor, özəl sektorla xeyriyyə təşkilatları arasında tərəfdaşlığın gücləndirilməsi sayəsində karbohidrogen resurslarından əldə olunan gəlirlərin iqlim fəaliyyətinə yönləndirilməsi və ölkə iqtisadiyyatının karbonsuzlaşmasına xidmət edən yaşıl enerji layihələri haqqında bəhs edilib.
Tədbirdə tərəfdaş qurumlar Paris İqlim Sazişinin hədəflərinə çatmaq məqsədilə inkişaf etməkdə olan ölkələrdə iqlimə dair maliyyə və sərmayə strategiyaları barədə fikir mübadiləsi aparıblar. Həmçinin, iqlimə dayanıqlı həllərə kapital cəlbi və sənaye sahələrinin karbonsuzlaşmasını sürətləndirmək üçün əsas mexanizmlər diqqət mərkəzində olub.
Tədbir çərçivəsində 9 sessiya təşkil olunub. Sessiyalarda innovativ maliyyə həlləri, karbonsuzlaşma, inkişaf etməkdə olan ölkələr üçün maliyyə axınlarının təşviqi, beynəlxalq şirkətlərin dayanıqlı inkişaf öhdəlikləri, əhatəli iqlim fəaliyyətini sürətləndirən dövlət-özəl tərəfdaşlığının gücləndirilməsi və Dayanıqlı İnkişaf Məqsədlərini dəstəkləyən yeni tərəfdaşlıqlar müzakirə edilib.
18:17 14.11.2024
Oxunuş sayı: 9655
