Yaxın Şərqdə vəziyyət daha da gərginləşə bilər-Açıqlama
Suriya Prezidenti Əhməd əl-Şaraa Nyu-Yorkda BMT Baş Assambleyası çərçivəsində keçirilən tədbirdə bildirib ki, İsrail Suriya ərazisindən çıxmalıdır.
Onun sözlərinə görə, təhlükəsizliklə bağlı narahatlıqlar danışıqlar yolu ilə müzakirə oluna bilər.
“Amma əsl sual budur: İsrailin, həqiqətən də, təhlükəsizlik narahatlıqları, yoxsa ekspansionist ambisiyaları var? Danışıqlar bunu üzə çıxaracaq”, - Suriya lideri vurğulayıb.
Əhməd əl- Şaraanın səsləndirdiyi fikirlər barədə Crossmedia.az-a danışan politoloq Elçin Xalidbəyli qeyd edib ki, hazırda İsrailin atdığı bütün addımlar Yaxın Şərqin yenidən dizayn olunmasına yönəlib: "Bu prosesdə ABŞ da İsrailə tam dəstək göstərir. Beləliklə, bölgədə vəziyyət daha da gərginləşir. İsrail hazırda həm Qəzza zolağında, həm də digər Yaxın Şərq ölkələrinə qarşı amansız hərbi əməliyyatlar həyata keçirir və bu, çoxsaylı insan tələfatına səbəb olur. Belə davranış beynəlxalq hüquq normaları baxımından yolverilməzdir. Son vaxtlar İsrail üçün beynəlxalq müstəvidə ciddi problemlər yaranmağa başlayıb. BMT Baş Assambleyasında Fələstin dövlətçiliyini tanıyan ölkələrin sayı sürətlə artmaqdadır. Xüsusilə Avropa dövlətləri ardıcıl şəkildə Fələstin dövlətinin müstəqilliyini rəsmən tanıdıqlarını bəyan ediblər və bu siyahı genişlənməkdə davam edir. Nəticədə İsrailin davranışları qlobal miqyasda onun əleyhinə siyasi mühit formalaşdırır. Onu da nəzərə almaq lazımdır ki, İsrailə qarşı genişmiqyaslı etirazlar mövcuddur. Məsələn, İspaniya İsraillə hərbi ticarət sazişlərini ləğv edib".
Ekspert, qeyd edib ki, bundan əlavə, Avropa İttifaqı da İsrailə qarşı sanksiyaların tətbiqi məsələsini gündəmə gətirib: "Bu isə İsrail üçün olduqca ciddi beynəlxalq təzyiq deməkdir. Lakin bütün bunlara baxmayaraq, İsrail bölgədə, o cümlədən Suriyada hərbi aqressiyasını davam etdirir. Halbuki Suriya müstəqil dövlətdir və beynəlxalq hüquq normalarına əsasən öz ərazi bütövlüyünə və sərhədlərinə nəzarət etmək hüququna malikdir. Bununla belə, İsrail bu ölkənin ərazilərinin müəyyən hissəsini öz nəzarəti altında saxlayır ki, bu da beynəlxalq hüququn kobud şəkildə pozulmasıdır. Digər tərəfdən, Suriyanın bərpa prosesi əsasən Türkiyənin nəzarəti altında davam edir. İsrail ordusunun Suriyada mövcudluğu isə Ankara ilə Təl- Əviv arasında hərbi toqquşma riskini artırır. Bu səbəbdən yaxın gələcəkdə iki ölkə arasında münasibətlərin daha da gərginləşməsi ehtimalı mövcuddur".
Politoloq, həmçinin mövcud vəziyyətin normallaşması üçün İsrailin qonşu dövlətlərlə münasibətlərində yumşalma siyasəti həyata keçirməsinin vacib olduğunu bildirib : "Mövcud vəziyyətin normallaşması üçün İsrailin qonşu dövlətlərlə münasibətlərində yumşalma siyasəti həyata keçirməsi vacibdir. Bununla yanaşı, Fələstin böhranının “iki dövlət” prinsipi əsasında nizamlanması və İsrail qüvvələrinin Suriya ərazisindən çıxarılması hazırda mühüm əhəmiyyət kəsb edir. Əks halda, regional vəziyyətin daha da gərginləşməsi istisna olunmur".
Elmir Heydərli
12:43 23.09.2025
Oxunuş sayı: 5835
