Ərdoğan Trampla görüşəcək: Liderlər arasında bu məsələlər müzakirə olunacaq - Açıqlama

Türkiyə Prezidenti Rəcəb Tayyib Ərdoğanla ABŞ-li həmkarı Donald Tramp arasında sentyabrın 25-də Vaşinqtonda görüş keçiriləcək. Bilidirilir ki, Trampla görüşündə regional məsələlər ön planda olacaq. "Bölgəmizdə münaqişə və gərginliyin azaldılmasında biz liderlərə böyük məsuliyyət düşür", - Ərdoğan deyib. O həmçinin Nyu-Yorkda da bir sıra dövlət və hökumət başçıları və iş adamları ilə görüşlər keçirəcəyini vurğulayıb.

Məsələ ilə bağlı Crossmedia.az-a açıqlama verən politoloq Sultan Zahidov Ərdoğanın BMT Baş Assambleyasının 23-cü sessiyasında çıxışında bir çox aktual məsələlərə toxunacağını qeyd edib: "Qeyd edim ki, Türkiyə lideri Rəcəb Tayyib Erdoğanın Nyu-Yorka səfəri baş tutub. Orada o, BMT Baş Assambleyasının 23-cü sessiyasında çıxış edəcək.

Düşünürəm ki, həmin çıxışda Ərdoğan dünyada baş verən aktual məsələlərə toxunacaq. Xüsusilə, Yaxın Şərqdə İsrailin atdığı addımlar, Qəzzanın bombalanması məsələsi gündəmə gələ bilər. Eyni zamanda onun Rusiya–Ukrayna münaqişəsinə dair mövqeyini ifadə edəcəyi də istisna deyil. Bundan başqa, Qafqazdakı proseslər, o cümlədən Zəngəzur dəhlizi məsələsinə də diqqət yetirilə bilər.

Sentyabrın 25-də isə Ərdoğanla Donald Tramp arasında ikitərəfli görüş nəzərdə tutulur. Bu görüşdə əsas müzakirə mövzusu ABŞ–Türkiyə münasibətləri olacaq. Xatırladaq ki, əvvəlki dövrlərdə bu münasibətlər müəyyən gərginliklərlə yadda qalmışdı. İndi isə Tramp dönəmində əlaqələrin yenidən nizama salınması gözlənilir.

Görüşdə F-16 qırıcılarının verilməsi, F-35 proqramı ilə bağlı məsələlər, həmçinin Yaxın Şərq, Suriya və İsrail mövzularının da gündəmə gələcəyi bildirilir. Ərdoğan sosial şəbəkədəki paylaşımında Donald Trampı “müttəfiq və dost” adlandırıb ki, bu da münasibətlərin hazırda yüksək səviyyədə olduğunu göstərir.

Bəzi mənbələrə görə, Ərdoğanın dəstəyi ilə hətta Suriya ilə ABŞ arasında da müəyyən təmasların qurulması mümkündür. Çünki rejim dəyişikliyindən sonra Suriyanın beynəlxalq aləmdə tanıdılmasında əsas vasitəçi ölkə məhz Türkiyə olub. ABŞ-ın Suriya qarşı sanksiyalarının yumşaldılmasında da Türkiyə diplomatiyasının rolu ola bilər".

Politoloq həmçinin Ərdoğan-Tramp görüşündə Rusiya-Ukrayna münaqişəsinin həll olmayacağını bildirib: "Rusiya–Ukrayna məsələsinə gəldikdə isə, düşünmürəm ki, Ərdoğanın Tramp ilə görüşü bu problemin həllinə gətirib çıxarsın. Alyaska görüşündə Tramp–Putin danışıqları da nəticə verməmişdi. Türkiyənin vasitəçiliyi ilə İstanbul danışıqları, əsir mübadiləsi və humanitar məsələlərdə müəyyən irəliləyiş əldə olunsa da, atəşkəs məsələsində ciddi nəticələr qeydə alınmayıb.

Bunun başlıca səbəbi Rusiyanın müharibəni davam etdirməkdə israrlı olmasıdır. Moskvanın əsas məqsədi Donbası tam şəkildə nəzarətə götürməkdir. Bu məqsədlə bölgəyə böyük hərbi qüvvələr cəmlənib. Son dövrlərdə Rusiyanın Polşa və Rumıniyaya dronlar göndərməsi, Estoniya hava məkanına qırıcı daxil etməsi də Kremlin geri çəkilmək niyyətində olmadığını göstərir. Rusiya atəşkəsdə maraqlı deyil, daha çox ərazi ələ keçirərək Ukraynanı kapitulyasiyaya vadar etmək istəyir".

Elmir Heydərli

🖨 Çap et

16:28 22.09.2025

Oxunuş sayı: 8238