Dünya Bankı 10 ildə iqlim maliyyələşdirilməsinə 150 milyard ABŞ dolları ayıracaq
Dünya Bankı qarşıdakı 10 il ərzində iqlim layihələrini maliyyələşdirmək üçün 150 milyard ABŞ dolları ayırmağı planlaşdırır.
Crossmedia.az Trend-ə istinadla xəbər verir ki, bunu Dünya Bankının Davamlı İnkişaf üzrə vitse-prezidenti Yurqen Föqel “Qlobal maliyyə sistemi: iqlim fəaliyyətinin maliyyələşdirilməsinin genişləndirilməsi” mövzusunda panel müzakirəsi zamanı bildirib.
“Dünya Bankı qarşıdakı 10 ildə iqlim layihələrinin maliyyələşdirilməsi üçün 150 milyard ABŞ dolları ayırmağı planlaşdırır. İnkişaf etməkdə olan ölkələrə 2030-cu ilədək karbon qazı emissiyalarını azaltmaq və gələcək risklərə hazırlaşmaq üçün illik 2,4 trilyon dollar lazım olacaq. Ölkələr, insanlar, iqtisadiyyatlar və şirkətlər çətin dövrlərdən keçirlər. Buna görə də hərəkətə keçməliyik. Bu, Dünya Bankı adından mənim mesajım ola bilər.
Keçən il biz inkişaf etməkdə olan ölkələrə 43 milyard ABŞ dolları ayırdıq. Bu, iqlim maliyyələşdirilməsi baxımından digər fondlarla müqayisədə inkişaf etməkdə olan ölkələr üçün ən böyük dəstəkdir. Dünya Bankı iqlim dəyişikliyinə davamlı borc şərtləri kimi yeni alətlər tətbiq edib. Ölkələr, xüsusilə kiçik ada dövlətləri, fəlakətlərlə qarşılaşdıqları zaman, həqiqətən, köməyə ehtiyac duyurlar. Hazırda 14 ölkə ilə sazişlərimiz var. Bu ölkələr fəlakətlə qarşılaşdıqları halda borc ödənişlərini təxirə sala və ya azalda biləcəklər. Bu, böyük dəstək göstərir”, – deyə o vurğulayıb.
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
07:40 14.11.2024
Oxunuş sayı: 6392
