İsrailin Qətərə hücumu Trampı narazı salıb: yeni hücumlar olmayacaq -AÇIQLAMA
Yaxın Şərqdə vəziyyət gərgin olaraq qalır. İsrail Fələstin, Suriyadan sonra Qətərlə də münasibətlərdə gərginlik yaşayır. Hələ regionda münasibətləri sabitləməyən İsrail yeni bir münaqişə ocağı yaratmağa cəhd edir. Xarici media qurumları məlumat verir ki, ABŞ Prezidenti Donald Trampla İsrailin Baş naziri Benyamin Netanyahu arasında telefon danışığı baş tutub və D.Tramp onu Qətərə hücum əmrləri verməməyə çağırıb. ABŞ dünyada daim sülhdən çıxış edən dövlət kimi bu təşəbbüsü normaldır. Bəs İsrail ABŞ-nin təşəbbüsünə əməl edəcəkmi? Yoxsa dünya yeni münaqişə ocağı ilə üz-üzədir?
Mövzu ilə bağlı politoloq Aytən Qurbanova Crossmedia.az-a açıqlama verib: “Düşünürəm ki, Tramp ilə Netanyahu arasında İsrailin hücum əməliyyatları ilə bağlı fikir ayrılıqları uzun müddətdir ki, müşahidə edilir. Ona görə də, bu tələbin birmənalı şəkildə yerinə yetiriləcəyini ifadə etmək çətindir. Amma beynəlxalq ictimaiyyətin Qətərə hücum ilə bağlı nümayiş etdirdiyi mövqe istisnasız olaraq İsrail üçün çəkindirici amil ola bilər. Xüsusilə də, Qətərin son illərdə ona yaxın münaqişənin həll edilməsində əsas vasitəçi dövlət qismində çıxış etməsi onun qlobal sistemdəki mövqeyini gücləndirən və təsir imkanlarımı artıran əsas məqamlardan birinə çevrilib. Belə olan halda bir çox qlobal aktorlar üçün ərəb dünyası ilə münasibətlərini Qətər nümunəsində formalaşdırmaq ənənəsi daha çox əhəmiyyət kəsb edir, nəinki belə bir tərəfdaşın İsrailin hücumları qarşısında dəstəklənməməsi. Nəticə etibarilə, Trampın bu tələbi bütövlükdə qlobal sistemin mövqeyini də ifadə etməklə İsrailin növbəti dəfə Qətəri hədəf almasına mane ola bilər”.
Ayhan
15:38 12.09.2025
Oxunuş sayı: 704
