Rusiya Ukraynanın hərbi müəssisələrinə kütləvi zərbə endirib
Rusiya Müdafiə Nazirliyi bildirib ki, sentyabrın 10-na keçən gecə "Rusiya qoşunları yüksək dəqiqlikli silahlar və pilotsuz uçuş aparatları ilə Ukraynanın hərbi-sənaye kompleksinin müəssisələrinə kütləvi zərbə endirib. Zərbələr İvano-Frankovsk, Xmelnyitski, Jitomir vilayətlərində, həmçinin Vinnitsa və Lvov şəhərlərində həyata keçirilib".
Crossmedia.az nazirliyə istinadən bildirir: "Zərbə məqsədlərinə nail olunub. Bütün təyin olunmuş obyektlər məhv edilib".
Qeyd edək ki, əvvəlcə Polşa hakimiyyəti bildirib ki, gecə Ukraynaya yönələn hücum zamanı bir neçə Rusiya dronu ölkənin hava məkanını pozub və NATO qüvvələri tərəfindən vurulub. Əməliyyatda Polşa F-16 döyüş təyyarələri, Niderland F-35-ləri, İtaliya AWACS kəşfiyyat və tankerləri iştirak edib.
Rusiya Müdafiə Nazirliyi Polşada vurulan dronlar barədə bildirib: "Zərbə üçün Polşa ərazisində obyektlər planlaşdırılmayıb. Zərbədə istifadə olunan Rusiya PUA-larının maksimum uçuş məsafəsi 700 kilometrdən çox deyil. Buna baxmayaraq, bu mövzu ilə bağlı Polşa Müdafiə Nazirliyi ilə məsləhətləşmələrə hazırıq".
16:38 10.09.2025
Oxunuş sayı: 858
