Doha hücumu: İsrail məsuliyyəti üzərinə götürdü, Qətər iddiaları təkzib edir
Ötən gün Qətərin paytaxtı Dohaya hücum olub. Son məlumata görə, hücum zamanı Qətər Daxili İşlər Nazirliyinin əməkdaşı da daxil olmaqla 6 nəfər ölüb, bir neçə nəfər yaralanıb.
İsrail paytaxt Dohaya hücuma görə məsuliyyəti öz üzərinə götürüb. Baş nazir Benyamin Netanyahunun Ofisindən bildirilib ki, İsrail hücumu başladı, İsrail onu idarə etdi və İsrail bütün məsuliyyəti öz üzərinə götürür.
Yaxın Şərq üzrə ekspert Vüqar Zifəroğlu açıqlamasında İsrailin bu gecəki hücumunun Doha ilə öncədən razılaşdırıldığı barədə səslənən iddiaları şərh edib:
“Faktiki olaraq bu iddia doğrulanmayıb və Qətər tərəfindən rəsmi olaraq təkzib edilib. Bununla bağlı beynəlxalq mediada da məlumatlar var. Qətər bu hava hücumunu “bütün beynəlxalq qanun və normaların açıq pozulması” kimi qiymətləndirərək sərt şəkildə qınayıb. İngiltərə Baş Nazirliyindən verilən açıqlamada isə Qətərin əvvəlcədən xəbərdar edilmədiyi vurğulanıb, yalnız ABŞ-ə xəbərdarlıq məqsədilə məlumat verildiyi, lakin tam razılaşdırılmadığı bildirilir. Ümumiyyətlə Qətər tərəfindən verilən rəsmi açıqlamalardan da aydın görünür ki, rəsmi Doha bu cür iddiaları “tamamilə əsassız” olaraq rədd edir”.
Politoloq Qətərin Həmas liderlərini nəyə görə deport etməməsi ilə bağlı da şərh verib:
“Daha əvvəllər də İsrail tərəfinin bu istiqamətdə müəyyən tələbləri, hətta diplomatik təzyiqləri olub. Məsələn, 2024-cü ildə yayılan xəbərlərə görə, ABŞ Qətərə təzyiq edərək, Həmas liderlərini deport etməsini tələb etmişdi, lakin Qətər və Həmas bu iddiaları rəsmi şəkildə rədd etmişdi. ABŞ tərəfdən də belə müraciətlər olub. Amma Qətər bunu qəbul etməyərək Həmas ilə əlaqəni davam etdirmişdi. Hazırda belə bir tələbin olub-olmadığı barədə yeni dəqiq məlumat yoxdur, yəni mövcud iddiaların yalnız keçmişdən qaynaqlandığı da istisna deyil”.
O ki qaldı ABŞ-nin bu hücumla əlaqəsinin olub-olmamasına, V.Zifəroğlu qeyd edib ki, ABŞ-nin tam şəkildə əməliyyata qatıldığına dair sübut yoxdur: “Lakin önəmli bir neçə məqam var ki, onlara diqqət edilməlidir. Bir sıra beynəlxalq media orqanlarının da yaydıqları informasiyaya görə, ABŞ administrasiyası hadisədən əvvəl xəbərdar edilib, lakin hücumla razılaşmadığı iddia edilir. Qətər tərəfinin iddiasına görə isə, ABŞ-nin hücumla razılaşmadığı reaksiyası, İsrail əməliyyata başladıqdan sonra verilib, əvvəl yox”.
(Müsavat.com)
13:24 10.09.2025
Oxunuş sayı: 6055
