Ermənistanın Avstriyadakı konsulu hava limanında həbs edilib
“Məlumatlarımıza görə, təxminən 2 ay əvvəl Ermənistanın diplomatik korpusunda səs-küylü bir həbsetmə baş verib və bunu gizli saxlamağa çalışıblar”.
Crossmedia.az xəbər verir ki, bu barədə Ermənistanın “Hraparak” nəşri yazıb.
Nəşr qeyd edib ki, Avstriyada Ermənistanın konsulu olmuş Aşxen Aleksanyan Ermənistan qayıdarkən, hava limanında həbs olunub.
KİV bildirib ki, gənc qadının üzərində sənədlər aşkar edilib və onun casusluq fəaliyyəti həyata keçirdiyindən şübhələniblər.
“Bundan sonra Milli Təhlükəsizlik Xidməti (MTX) bütün bir gün Xarici İşlər Nazirliyinin (XİN) binasında axtarış aparıb, kompüterlər araşdırılıb, sənədlər yoxlanılıb. Qərar qəbul edilib ki, bu həbsetmə gizli saxlanılsın, çünki böyük bir qalmaqala səbəb ola bilər.
Məsələ ondadır ki, diplomatik korpusda hər hansı bir şəxsin yüksək vəzifəyə təyin olunmasından əvvəl MTX onun keçmişini, şübhəli əlaqələrini və s. yoxlayır. Təyinat yalnız müvafiq dəqiq araşdırmadan sonra həyata keçirilir və nəticələr təyin edənə təqdim olunur. İndi isə belə çıxır ki, ya bu işdə nöqsan buraxıblar, bu isə məsuliyyət məsələsi yaradır, ya da təyin edənlər hansısa məqamlara göz yumublar.
Üstəlik, “ört-basdır” çərçivəsində Aşxen Aleksanyanla bağlı bütün məlumatlar internetdən, açıq mənbələrdən silinib və hətta onun təyinatı ilə bağlı rəsmi xəbər də aradan qaldırılıb. Amma XİN sisteminin köhnə əməkdaşlarından biri bizimlə söhbətində dedi ki, Aşxeni çox yaxşı tanıyır: o, əvvəlcə dövlət qulluqçusu vəzifəsində işləyib, sonra XİN-in konsulluq şöbəsində fəaliyyətə başlayıb və diplomat adı alıb, bundan sonra isə onun haqqında heç bir məlumatı yoxdur”, - deyə nəşr vurğulayıb.
10:25 29.08.2025
Oxunuş sayı: 5045
