“Bir neçə tərbiyəsizə görə ərəb dünyası ilə münasibətlərimizi korlaya bilmərik” - Deputat
Şəhidlər Xiyabanında bəzi ərəb turistlərin etdiyi qeyri-etik hərəkətlər Azərbaycan xalqı tərəfindən dərin narazılıqla qarşılanıb. Azərbaycan həmişə xarici siyasətində dövlətlərə və millətlərə, o cümlədən ərəb xalqına və onun zəngin mədəniyyətinə hörmət prinsipini qoruyub və bu yanaşmanı turistlər də daxil olmaqla bütün xarici qonaqlara tətbiq edib. Ancaq bu turistlərin sərt tənqidi edilə bilər, çünki onların insana yaraşmaz davranışları sadəcə Azərbaycanın qeyri-maddi dəyərlərinə hörmətsizlik deyil, həm də öz mədəniyyət və əxlaq normalarına ziddir. Şəhidlik yalnız müsəlman dinində var. Onlar bunu bəlkə də bilmirlər ki, bu da onların mənəviyyatsızlığının göstəricisidir.
Mövzu ilə bağlı Milli Məclisin deputatı Nəsib Məhəməliyev Crossmedia.az-a açıqlama verib: “Şəhidlər Xiyabanında əxlaq normalarını pozan və videolar çəkən əcnəbi turistlərə qarşı, 3 aylıq həbs qəti imkan tədbiri seçilməsi barədə məhkəmə qərarını ədalətli hesab edirəm. Fərq etməz, istər şəhidlər xiyabanı, istərsə adi qəbiristanlıq, dinindən, irqindən, milliyətindən asılı olmayaraq qəbiristanlıqlar hər kəs üçün müqəddəs yer sayılır. Ələlxüsus, yenicə müharibədən çıxmış, minlərlə şəhid vermiş Azərbaycan xalqı üçün, şəhid mövzusu, olduqca həssasdır, demək olar ki, ondan o tərəfə heç nə yoxdur, qırmızı xəttdir. Bunları bilməyən insan yoxdur. Hesab edirəm ki, bu vandallıqdır, cinayət hadisəsidir və həmin şəxslərin şəxsiyyətləri, hər hansı terror təşkilatlarına və yaxud xüsusi xidmət orqanlarına bağlılığı araşdırılmalıdır. Yeri gəlmişkən, ayıq-sayıqlıq nümayiş etdirdiklərinə, operativ şəkildə reaksiya verdiklərinə görə daxili işlər orqanlarına xüsusi təşəkkür düşür. Belə halların qarşısı qətiyyətlə alınmasa, təxribatların sayı arta bilər. Bütün bunlarla yanaşı, mən bu məsələnin dini, milli müstəviyə çıxarılmasını, İslam müqəddəslərinin təhqir olunmasını, dövlətlərarası münasibətlərə toxunulmasını qəbul etmirəm”.
Deputat həmçinin bildirib: “Bizim işğal altında olan torpaqlarımızla bağlı İslam Əməkdaşlıq Təşkilatı birmənalı dəstəyini vermişdir. Yalnız qonşu İranı və onun təsiri altında olan Əsəd Suriyasını və Livanı çıxmaq şərtilə. Biz, bir neçə tərbiyəsizə görə ərəb dünyası ilə münasibətlərimizi korlaya bilmərik. Televiziya kanallarımız, kütləvi informasiya vasitələrimiz ehtiyatlı davranmalıdırlar. Düşmənin dəyirmanına su tökmək olmaz. Sosial şəbəkələrə diqqət etsəniz, molla rejiminə bağlı saytların, fəalların aktivləşdiyinin şahidi olarsınız. Birinci hal deyil, zamanla bu tipli hadisələrdən öz məqsədləri üçün yararlananları görmüşük. Hər bir millətin yaxşısı da, pisi də, tərbiyəlisi də, tərbiyəsizi də var. Ona görə də, biz hər kəsə öz mədəniyyətimizi, qonaqpərvərliyimizi göstərməli, qanunlarımızı pozanlara qarşı hüquq çərçivəsində sərt davranmalıyıq”.
Ayhan
19:17 19.08.2025
Oxunuş sayı: 767
