"Ermənistan rəhbərliyi davamlı və etibarlı sülh, erməni xalqının xoş gələcəyini istəyirsə, qətiyyətli addımlar atmalıdır” - Musa Qasımlı
Ermənistanın Baş naziri Nikol Paşinyan xalqa müraciətində bildirib ki, Vaşinqton razılaşmaları təkcə Ermənistan üçün deyil, həm də Azərbaycan və ABŞ üçün mühüm uğurdur. Onun sözlərinə görə, əldə olunan sazişlər dövlətçiliyin möhkəmlənməsi, müstəqilliyin və sabitliyin təmin olunması baxımından xüsusi əhəmiyyət daşıyır. Paşinyan vurğulayıb ki, qarşılıqlı razılaşma tərəflərə uzunmüddətli sabitlik və inkişaf vəd edir.
Paşinyanın bu açıqlaması onun sülh prosesinə verdiyi siyasi çəkini göstərir. Vaşinqton razılaşmalarının həm Ermənistan, həm də Azərbaycan üçün uğur kimi təqdim olunması, tərəflərin gələcəkdə qarşıdurmadan daha çox əməkdaşlığa yönələcəyinə ümid yaradır. Lakin bu prosesin uğuru razılaşmaların real həyata tətbiqindən asılı olacaq.
Mövzu ilə bağlı Milli Məclis sədrinin müavini Musa Qasımlı Crossmedia.az-a açıqlama verib.
O, Vaşinqtonda imzalanmış sənədlərin ciddi addım olduğunu bildirib: “Dövlətimizin və millətimizin cənab Prezidentimiz İlham Əliyevin rəhbərliyi altında döyüş meydanında qazandığı möhtəşəm qələbənin Vaşinqtonda siyasi-diplomatik sahədə də qəbul edilməsi böyük tarixi hadisə, bilavasitə cənab Prezidentimizin diplomatiyasının nəticəsidir. Vaşinqtonda Prezident Donald Trampın şahidliyi ilə imzalanmış sənədlər Azərbaycan-Ermənistan münasibətlərində bir sıra amilləri ehtiva edən normallaşma istiqamətində ciddi addımdır. Əldə edilmiş razılaşmalar Azərbaycanın, Ermənistanın, həmçinin regionda sülh istəyən bütün dövlətlərin və xalqların maraqlarına tamamilə uyğundur. Sülhdən, mehriban qonşuluqdan və qarşılıqlı faydalı əməkdaşlıqdan indiyədək heç bir xalq və dövlət ziyan görməyib. Azərbaycan həmişə müharibənin, günahsız qan tökülməsinin əleyhinə olub və yaxşı, dürüst qonşuluq nümunəsi yaradıb".
M.Qasımlı söyləyib ki, sülhün bərqərar edilməsi Ermənistanın dövlət müstəqilliyini möhkəmləndirəcək, inkişafa aparacaq, xalqın həyat şəraitini yaxşılaşdıracaq: "Bu ölkənin gələcəyi qonşularla dil tapıb normal münasibətlər qurmaqdan asılı olduğuna görə hakimiyyət yekun sülh sazişinin imzalanması yolundakı bütün əngəlləri, xüsusən əvvəlki illərdə qəbul edilmiş sənədləri ləğv etməlidir. Əlbəttə, bu proses asan olmayacaq. Ona mane olan daxili qüvvələr və regionda çirkin niyyətləri olan xarici dairələr müxtəlif üsullardan – terror, sui-qəsd, kiberhücum, mitinq, yeni gərginlik ocaqları yaratmaq, toqquşma törətmək, böhtan dolu informasiyalar yaymaq, ictimai rəyi çaşdırmaq, diaspor və digər ənənəvi və qeyri-ənənəvi vasitələrdən istifadə edəcəklər. Lakin hər şey Ermənistan hakimiyyətinin qətiyyətindən asılıdır. Əgər Ermənistan rəhbərliyi davamlı və etibarlı sülh, erməni xalqının xoş gələcəyini istəyirsə, qətiyyətli addımlar atmalıdır”.
Nicat Rüstəmzadə
16:35 19.08.2025
Oxunuş sayı: 6385
