“Hizbullah ordunu və dövləti qarşı-qarşıya qoymağa çalışır”
Livan Silahlı Qüvvələrinin xarici əlaqələr üzrə rəsmi nümayəndəsi Kuyumdjian Səudiyyə televiziyası Al-Hadath kanalına açıqlamasında bildirib ki, Hizbullah hələ də silahsızlanmaqdan imtina edir və məqsədi ölkənin ordu strukturu ilə dövlət arasında qarşıdurma yaratmaqdır.
O qeyd edib ki, bu vəziyyət Livan üçün ciddi təhlükə yaradır və ölkədə sabitliyin qorunması üçün hər iki tərəfin ehtiyatlı davranması vacibdir. Kuyumdjian əlavə edib ki, ordu və hökumət ölkədə təhlükəsizliyi təmin etmək üçün bütün tədbirləri görməyə hazırdır.
Crossmedia.az xarici mediaya istinadən bildirir ki, rəsmi nümayəndə həmçinin vurğulayıb ki, Hizbullahın bu addımları yalnız ölkənin daxili stabilliyini deyil, həm də regiondakı təhlükəsizlik mühitini təhdid edir. O, həmçinin qeyd edib ki, Livan hökuməti və Silahlı Qüvvələr siyasi və diplomatik vasitələrdən istifadə edərək qarşıdurmanın qarşısını almağa çalışır, lakin silahlı qrupların davranışı vəziyyəti mürəkkəbləşdirir.
Analitiklər bildirirlər ki, Hizbullahın ordunu və dövlət institutlarını hədəf alması Livanın daxili siyasi böhranını dərinləşdirə və regionda sabitliyi pozan yeni gərginliklərə yol aça bilər.
Zəhra Ağayeva
16:31 15.08.2025
Oxunuş sayı: 6881
