ABŞ-də Azərbaycan və Ermənistan liderləri arasında mühüm görüş: "Regionla bağlı müsbət addımlar gözlənilir"
Ermənistan baş nazirinin aparat rəhbəri Araik Arutyunyan bildirib ki, Nikol Paşinyan 7–8 avqust tarixlərində ABŞ-a səfər edəcək. Vaşinqton səfəri çərçivəsində o, ABŞ Prezidenti Donald Trampla ikitərəfli görüş keçirəcək və bu görüşdə Ermənistan ilə ABŞ arasında strateji tərəfdaşlığın möhkəmləndirilməsi məsələləri müzakirə olunacaq.
Həmçinin, regionda sülh, sabitlik və iqtisadi əməkdaşlıq məsələlərinə həsr olunmuş, Azərbaycan Prezidenti İlham Əliyevin də iştirak edəcəyi üçtərəfli görüşün keçirilməsi planlaşdırılır.
Gözlənilən görüşlə bağlı fikirlərini Crossmedia.az-la bölüşən Milli Məclisin deputatı Müşfiq Məmmədli deyib ki, Cənubi Qafqazda sülh və əməkdaşlıq mühitinin təmin olunması, nəqliyyat xətlərinin açılması, dəhlizlərin işə düşməsi Qlobal Cənuba rəhbərlik edən Çinin, ABŞ - nin və digər Qərb ölkələrinin marağındadır: "Türkiyə Azərbaycanın strateji tərəfdaşı kimi bu məsələyə mühüm töhfə verir. Azərbaycan isə Orta Şərqdə aparıcı roy oynayan bir aktordur. Bunları nəzərə alsaq deməliyik ki, mənzərə tamamlanır. Çatışmayan yeganə məqam Ermənistanın ziqzaqvari siyasətindən əl çəkməsidir. Əgər İrəvan sülhlə bağlı konkret mövqe ortaya qoysa, regionda durum tamamilə dəyişəcək. Azərbaycan və Ermənistan sülh sazişi mətninin paraflanması bu istiqamətdə mühüm addımdır. ABŞ kimi nəhəng dövlətin baç verənlərdə maraqlı olması və bölgənin əsas gücü Azərbaycanın prosesdə öndə getməsi hər kəsdə əminlik yaradır ki, müsbət addımların atılması davam edəcək".
Kənan Novruzov
13:27 06.08.2025
Oxunuş sayı: 1228
