Təyyarəmiz generalın əmri ilə vurulub - Yeni sensasion məlumat
Etibarlı mənbələrə istinadla 2024-cü il 25 dekabr tarixində AZAL-ın Bakı-Qroznı reysi ilə uçan mülki “Embraer 190” təyyarəsinin vurulması ilə bağlı yeni və sensasion məlumat yayılıb. Araşdırma insidentin hərbi strukturlardakı ciddi rabitə pozuntuları, radar nasazlıqları və əmrlərin məsuliyyətsiz şəkildə verilməsi nəticəsində baş verdiyini ortaya qoyur.
Hadisənin xronologiyası:
03:26 – “Pilotsuz təhlükə” siqnalı elan olunur. Bu siqnal 12:00-dək qüvvədə qalır və Şimali Qafqaz Federal Dairəsindəki hərbi strukturlara ötürülür.
08:05 – “Xalça” siqnalı işə salınır. Bu siqnal havada olan bütün hava gəmilərinin (axtarış-xilasetmə və hərbi dronlar istisna olmaqla) dərhal enməsini və ya zonanı tərk etməsini tələb edir.
07:23 – 09:07 aralığında "Embraer 190" təyyarəsi radar izləməsində olur. Lakin 08:09 – 08:13 arasında təyyarənin radar izlənməsi qəfil kəsilir.
08:12 – Kapitan Dmitri Paladiçuk pilotsuz uçuş aparatı olduğunu ehtimal etdiyi hava hədəfi barədə məlumat verir.
08:13 – General-mayor Aleksandr Tolopilo hədəfin məhv edilməsi əmri verir. İki "95-Ya6" tipli raket buraxılır və mülki təyyarəyə tuş gəlir.
“Minval Politika”nın əldə etdiyi məlumatlara görə:
Radar və “Pantsir-S” zenit-raket kompleksində texniki nasazlıqlar olub;
Tolopilo hadisənin obyektiv nəzarət görüntülərini saxtalaşdırmağa cəhd edib, guya raketlərin öz-özünə məhv olduğunu bildirib;
Radar izləməsinin itməsi və təyyarənin “pilotsuz aparat” kimi səhv identifikasiya olunması ilə bağlı istintaq materialları gizlədilib;
General-mayor cəzalandırılmaq əvəzinə yeni vəzifəyə – Şərq Hərbi Dairəsinə təyinat alıb. Daha sonra istintaq dayandırılıb, məsuliyyət ört-basdır edilib. Bütün bu ciddi qanun pozuntularına baxmayaraq, Rusiya Aerokosmik Qüvvələrinin rəhbərliyi və 4-cü Hərbi Hava Qüvvələri və Hava Hücumundan Müdafiə Ordusunun komandanlığı hadisə ilə bağlı istintaqın gedişinə əngəl törədib.
Əldə edilən sənədlər göstərir ki, mülki bir təyyarə pilotsuz düşmən cihazı ilə səhv salınıb və nəticədə sərnişinlərin və ekipaj üzvlərinin həyatı bahasına faciə baş verib.
Xatırladaq ki, qəza nəticəsində təyyarədəki bütün sərnişin və heyət üzvləri həlak olmuşdu. Hadisə beynəlxalq səviyyədə rezonansa səbəb olmuş, lakin rəsmi Moskva təfərrüatları uzun müddət gizli saxlamışdı. Bu yeni məlumatlar isə məsuliyyətin konkret hərbi şəxslərə aid olduğunu göstərir.
Qeyd edək ki, həmçinin 2024-cü ilin 25 dekabrında Bakı-Qroznı reysi üzrə hərəkət edən AZAL-a məxsus “Embraer 190” sərnişin təyyarəsinin vurulmasına səbəb olan şəxslərin siyahısı yayılıb. (axar.az)
09:28 25.07.2025
Oxunuş sayı: 1357
