Rumıniya Türkiyədən HİSAR sinifli hərbi gəmi alır – 265 milyon avroluq müqavilə
Rumıniya Qara dənizdəki hərbi mövcudluğunu gücləndirmək məqsədilə Türkiyədən HİSAR sinifinə aid TCG Akhisar (P1220) yüngül korvetini almaq üçün rəsmi addım atıb.
Crossmedia.az xəbər verir ki, bu barədə Defence Türk platforması məlumat yayıb.
Rumıniya Müdafiə Nazirliyi bildirib ki, layihənin ümumi dəyəri təxminən 265 milyon avro (ƏDV-siz) təşkil edir. Bu məbləğə gəminin silahlandırılması, lakin gəmiəleyhinə raket sistemləri daxil deyil.
Korvetin mövcud konfiqurasiyadakı qiyməti isə təxminən 223 milyon avro + ƏDV olaraq göstərilir. TCG Akhisar gəmisinin Rumıniyaya təhvil verilməsi təxminən 6 ay müddətində baş tutacaq. Daha sonra gəmi yerli gəmiqayırma zavoduna aparılaraq, Rumıniya Hərbi Dəniz Qüvvələrinin sifariş etdiyi döyüş sistemləri ilə təchiz ediləcək.
Uzunluğu 99,5 metr, suya buraxma çəkisi 2300 ton olan müasir korvet MKE istehsalı 76 mm-lik artilleriya qurğusu və ASELSAN şirkətinin hazırladığı GÖKDENİZ yaxın məsafəli hava hücumundan müdafiə sistemi ilə silahlandırılıb. Gəmidə həmçinin vertolyot və pilotsuz uçuş aparatı üçün anqar da mövcuddur.
Nigar Rəhimova
19:57 19.07.2025
Oxunuş sayı: 7189
