İran: Sanksiyalar artsa, uranı daha çox zənginləşdirəcəyik
İran Parlamentinin Təhlükəsizlik və xarici siyasət komitəsinin üzvü İbrahim Rəzaei bildirib ki, Tehrana qarşı sanksiyaların sərtləşdirilməsi halında İran Nüvə Silahlarının Yayılmamasına dair Müqavilədən (NSYM) çıxa və ya uranın zənginləşdirilməsini 60%-dən yuxarı səviyyəyə qaldıra bilər.
Crossmedia.az xəbər verir ki, bu barədə “Tasnim” agentliyi məlumat verib. Rəzaei qeyd edib ki, İran hazırda MAQATE ilə əməkdaşlığı nəzərdə tutan əlavə protokolun icrasını könüllü şəkildə dayandırıb və hələ də NSYM-in iştirakçısıdır. Lakin təzyiqlər davam edərsə, gündəlikdə müqavilədən çıxmaq, uranın daha yüksək səviyyədə zənginləşdirilməsi, müasir sentrifuqaların istehsalı və ixracı, eləcə də nüvə əməkdaşlığının genişləndirilməsi məsələləri ola bilər.
O, həmçinin vurğulayıb ki, Avropa üçlüyünün (Fransa, Almaniya və Böyük Britaniya) BMT Təhlükəsizlik Şurası sanksiyalarının bərpasını nəzərdə tutan “snapback” mexanizmini işə salması belə İrana ciddi təsir etməyəcək: “Çünki ölkə artıq ən sərt beynəlxalq sanksiyalar altında fəaliyyət göstərir”.
Nigar Rəhimova
19:31 19.07.2025
Oxunuş sayı: 721
