Britaniya səfirinə çağırış: "Xoşu gəlmirsə səfirliklərini bağlaya bilərlər"
Azərbaycan mətbuatının 150 illiyi ilə bağlı müxtəlif tədbirlər keçirilir. Tədbirlərdə mətbuatın tarixi və şərəfli yolu, bugünki azad Azərbaycan mətbuatının vəziyyəti danışılır, inkişaf üçün müzakirələr aparılır. Bu baxımdan, müxtəlif yerli və xarici qonaqların tədbirdə iştirakı, onların Azərbaycan mətbuatı ilə bağlı fikir və tövsiyələri də prosesə əlavə dinamika qatır. Lakin tədbirlərdən birində, Böyük Britaniyanın Azərbaycandakı səfiri Fergus Auldun çıxışı haqlı narazılıq doğurdu. Səfirin mətbuat azadlığı ilə bağlı səsləndirdiyi bəzi ittihamlar və tənqidlər, əslində tədbirin mahiyyətindən, məqsədindən və ruhundan kənara çıxaraq, daha çox siyasi məna daşıyan, ölkənin daxili işlərinə müdaxilə xarakteri daşıyan bir çıxış idi.
Qeyd etmək lazımdır ki, Azərbaycanın informasiya siyasəti və media mühiti ilə bağlı məsələlərin daxili hüquqi-normativ çərçivədə və milli maraqlar kontekstində tənzimlənməsi prinsipial məsələdir. Xarici diplomatın jurnalistlər qarşısında belə bir ritorika ilə çıxış etməsi, yalnız tədbirin ab-havasını pozmadı, eyni zamanda ölkəmizin suverenliyinə və daxili işlərinə hörmət prinsipinə zidd addım idi. Bu kimi çıxışlar, hər nə qədər "tövsiyə xarakterli" göstərilsə də, əslində milli maraqlara və medianın daxili inkişaf modelinə qarşı birbaşa təzyiq vasitəsi kimi də dəyərləndirilə bilər.
Mövzu ilə bağlı Mətbuat Şurasının idarə heyətinin üzvü Azər Həsrət Crossmedia.az-a açıqlama verib:
“Bunu deyə bilərəm ki, birincisi Britaniya səfiri çox təəssüflər olsun ki, Azərbaycan mətbuat bayramı adı altında keçirdiyi tədbirdə faktiki olaraq ona dəxli olmayan məsələlərə burnunu soxub. O bir bayram tədbiri idi. Əgər bizim həmkarlarımızı ora təbrik etmək məqsədilə çağırmışdısa, deyib gülər, söhbət edərdilər. Səfirin mətbuat azadlığı ilə bağlı narahatlığı varsa bunu müvafiq şəkildə Azərbaycan xarici işlər nazirliyinə yazılı şəkildə təqdim edərdi. O məclisdə o söhbətin edilməsi doğru deyil. İkincisi, mən uzun illərdir Britaniya səfiri məni tədbirlərə dəvət etmir, bunu da dərd etmirəm. Amma çağırmış olsaydılar və bu cür çıxışlar olsaydı, şəxsən mən o məclisi tərk edərdim. Təbiidir ki, bunu bir qədər də nümayişkəranə edərdim. Mən düşünürəm ki, Azərbaycan XİN-də səfirə bununla bağlı müvafiq nota təqdim etməlidir. Çünki “bayram tədbiri” adı altında jurnalistləri dəvət edib Azərbaycan dövlətinə yüklənmək heç doğru deyil. Hər hansı ölkənin səfirinin həddi deyil ki, Azərbaycanın işlərinə qarışsın. Əgər xoşları gəlmirsə səfirliklərini bağlayıb gedə bilərlər. Hətta diplomatik əlaqələrini də kəsə bilərlər”.
Ayhan
14:05 19.07.2025
Oxunuş sayı: 9294
