“Ermənistanda vətəndaş müharibəsi başlayır”- Proqnoz
Ermənistanın baş naziri Nikol Paşinyan, arxiyepiskoplar Baqrat Qalstanyan və Mikael Acapaxyanın cinayət təqibinin qanunsuz olduğu barədə bəyanata reaksiya verib. O, din xadimlərini hərbi çevriliş planlaşdırmaqda ittiham edib. Paşinyan bildirib ki, əgər katolikos II Qaregin bu həbsləri qanunsuz hesab edirsə, deməli o da çevriliş ideyasını dəstəkləyi.
Ermənistanda artan daxili siyasi gərginlik barədə Crossmedia.az-a danışan politoloq Zeynal Əmrəliyev bildirib ki, Ermənistanda uzun illərdir kilsə ilə dövlət arasında münasibətlərdə gərginlik müşahidə olunur: “Bu ziddiyyətlər son illərdə daha da dərinləşib və artıq açıq qarşıdurma müstəvisinə keçib. Ermənistan Apostol Kilsəsi sadəcə dini qurum olmaqdan çıxaraq, ölkədəki siyasi proseslərə birbaşa təsir göstərən gücə çevrilib. Ermənistan kilsəsi uzun müddətdir ki, hakimiyyətin dəyişdirilməsi üçün mübarizə aparır və bu kontekstdə əsasən Rusiyanın təsirində olan bir institut kimi çıxış edir, bu kilsə eyni zamanda erməni separatizminin ideoloji dayaqlarından biri olub və bu missiyasını bu gün də davam etdirir. Ermənistan kilsəsi indiki mərhələdə də Paşinyan hökumətini devirmək istiqamətində fəaliyyət göstərir. Əslində, kilsə ilə dövlət arasında münasibətlərin pozulması yeni məsələ deyil. 2018-ci ildə Paşinyan hakimiyyətə gəldikdən sonra bu münasibətlərdə gərginlik müşahidə olunmağa başlamışdı. Amma bu qarşıdurma 2024-cü ildə daha da dərinləşdi, Tavuşun arxiyepiskopu Baqrat Qalstanyanın faktiki olaraq müxalifət liderinə çevrilməsi və hökumət əleyhinə nümayişlərə rəhbərlik etməsi vəziyyəti daha da mürəkkəbləşdirib. Bu hadisə Ermənistan Apostol Kilsəsinin artıq siyasi güc kimi çıxış etdiyini açıq şəkildə nümayiş etdirir”.
Onun sözlərinə görə, bu mərhələyə qədər kilsə müəyyən mənada sakitliyini qoruyurdu: “Yəni açıq qarşıdurmadan çəkinir, hökumətə qarşı mövqeyini dolayı yollarla bildirirdi. Lakin 2025-ci ildə artıq bütün ermənilərin Katolikosu II Qaragenin birbaşa hökumət əleyhinə çıxışları və Nikol Paşinyanın ona verdiyi cavab münasibətlərin nə qədər kəskinləşdiyini ortaya qoydu. Bu qarşıdurma Ermənistan cəmiyyətinin iki hissəyə bölündüyünü göstərir. Hökumətlə dini rəhbərlik arasında gedən açıq mübarizə kilsənin nə qədər siyasiləşdiyini və artıq dini çərçivədən çıxdığını sübut edir. Kilsə bu gün artıq ruhani xidmətdən daha çox siyasi məqsədlərə xidmət edir. Erməni xalqının mənəvi rəhbəri olmaq əvəzinə, fərqli maraqlara xidmət edən bir struktur kimi fəaliyyət göstərir. Digər dövlətlərin maraqlarını Ermənistan daxilində həyata keçirməyə çalışan bir “beşinci kolon”a çevrilib. Hazırkı vəziyyətin iki ehtimal olunan nəticəsi var: ya kilsə bu qarşıdurmadan məğlub çıxacaq və siyasi səhnədən çəkiləcək, ya da xarici hamiləri ilə birləşərək Paşinyan hakimiyyətini devirməyə nail olacaq. Hər iki halda bu proseslər Ermənistanı vətəndaş qarşıdurmasına, hətta vətəndaş müharibəsinə qədər apara bilər”.
18:49 08.07.2025
Oxunuş sayı: 1210
