İran prezidenti BMT-nin nüvə agentliyi ilə əməkdaşlığı dayandıran qanunu təsdiqləyib
İran prezidenti Məsud Pəzəşkian Birləşmiş Millətlər Təşkilatının Atom Enerjisi üzrə Beynəlxalq Agentliyi (MAQATE) ilə əməkdaşlığın dayandırılmasını nəzərdə tutan qanunu təsdiqləyib. Bu addım Tehranın zədələnmiş nüvə proqramını yenidən işə salmaq imkanlarını beynəlxalq nəzarətdən gizlədə bilər. Prezidentin qərarı parlamentin ötən həftə qəbul etdiyi qanunun icrası üçün atılıb.
Crossmedia.az xarici mediaya istinadən bildirir ki, İran MAQATE-ni İsraillə əməkdaşlıqda ittiham edir və hesab edir ki, bu əməkdaşlıq onun nüvə obyektlərinə edilən hücumlara zəmin yaradıb. Dövlətə məxsus IRNA agentliyi bildirib ki, Pəzəşkian İranın Atom Enerjisi Təşkilatına, Ali Milli Təhlükəsizlik Şurasına və Xarici İşlər Nazirliyinə yeni qanunun icrasına başlamağı tapşırıb. Lakin qanunun konkret nə zaman və necə tətbiq olunacağı hələlik məlum deyil.
MAQATE-nin sözçüsü açıqlamasında bildirib ki, agentlik bu xəbərlərdən xəbərdardır və İrandan rəsmi məlumat gözləyir. Almaniya isə İran prezidentinin bu qərarını “faciəvi siqnal” adlandırıb. Almaniya Xarici İşlər Nazirliyinin sözçüsü Martin Qizə deyib ki, diplomatik həll üçün Tehranla MAQATE arasında əməkdaşlıq vacibdir.
Xatırladaq ki, ötən ay İsrail İranın hərbi komandirlərini, nüvə alimlərini və obyektlərini hədəf alan misilsiz hücum həyata keçirib. ABŞ də bu hücumlara dəstək olaraq Natanz, İsfahan və Fordo şəhərlərindəki obyektlərə zərbələr endirib. Tərəflər arasında 12 gün davam edən qarşıdurma yalnız ötən həftə əldə edilən atəşkəslə dayandırılıb.
İran hücumlar nəticəsində nüvə obyektlərinin zərər gördüyünü açıqlayıb, lakin “sülh məqsədli” nüvə proqramını davam etdirəcəyini bəyan edib. MAQATE isə bildirib ki, ABŞ zərbələri proqramı tam sıradan çıxarmayıb və Tehran bir neçə ay ərzində uranı zənginləşdirməyə qayıda bilər. Qeyd edək ki, MAQATE son hesabatında İranın uranı silah səviyyəsinə yaxın səviyyədə zənginləşdirdiyini və proqramın tam sülh məqsədli olduğunu təsdiqləyə bilmədiyini açıqlamışdı. Bu isə İran tərəfindən agentliyə qarşı kəskin tənqidlərə səbəb olub.
Fatimə Nəbiyeva
18:05 02.07.2025
Oxunuş sayı: 7347
