“Cinayətin miqyası o qədər böyükdür ki, onu Stalin repressiyaları ilə müqayisə etmək olar” - Deputat
Rusiyanın azərbaycanlılara qarşı həyata keçirdiyi son faşist xarakterli cinayət əməlləri bir daha bu ölkənin daxilində kök salmış milli ayrı-seçkilik, irqçilik və qeyri-rus millətlərə qarşı düşmənçilik siyasətini açıq şəkildə üzə çıxarır. Azərbaycanlılara qarşı törədilən bu zorakılıq aktları təkcə fərdi insident kimi deyil, həm də sistemli şəkildə aparılan bir siyasətin tərkib hissəsi kimi dəyərləndirilməlidir. Bu hal beynəlxalq hüququn və insan haqlarının kobud şəkildə pozulması olmaqla yanaşı, regionda sülh və sabitliyə qarşı açıq təhdiddir.
Mövzu ilə bağlı deputat Elman Nəsirov Crossmedia.az-a açıqlama verib: “Azərbaycan Rusiya münasibətlərində sözün əsl mənasında diplomatik böhran yaşanır. Nəzərə alsaq ki, elə bu böhranın baş verməsi özü məntiqsizdir. Çünki Azərbaycan Rusiya münasibətləri son 3 ildir strateji müttəfiqlik səviyyəsinə yüksəlib. Rusiya isə öz strateji müttəfiqinə qarşı belə müthiş cinayətə əl atmamalı idi. Hətta cinayətin miqyası o qədər böyükdür ki, onu Stalin repressiyaları ilə müqayisə etmək olar. Stalin zamanında heç olmasa yalandan da olsa bir məhkəmə keçirilirdi. Amma 27 iyun sübh tezdən azərbaycanlılara qarşı törədilən bu cinayətdə heç bir məhkəmə qərarı yox idi. Bütün bunların əsas səbəbi kimi isə 2001-ci ildə qurama bir cinayət iddiasını irəli sürürlər. Bir iddia varsa, müstəntiqlər var, istintaq komissiyası var. İlk olaraq dindirilmə olmalı daha sonra isə məhkəmə qərarı çıxarılmalı idi. Bu barbarlıqdan başqa bir şey deyil. Görünür bütün yollar Moskvaya aparır. Mən düşünmürəm ki, bu hadisə Yekaterinburq hüquq mühafizə orqanları səviyyəsində olsun. Onlar sadəcə icraçıdır. Bəs təşkilatçı kimdir? Əsas sual budur”.
Deputat həmçinin qeyd edib: “Bu hadisə ikitərəfli münasibətlərimizə çox mənfi təsir edib. Maraqlıdır ki, Rusiyanın hakim dairələri bilmirmi ki, hazırda Rusiyanın dostlarının sayı iki əlin barmaqlarını keçmir. Azərbaycan kimi strateji müttəfiqi itirmək Rusiyaya lazım deyil. Baxmayaraq ki, beynəlxalq aləm anti-Rusiya siyasəti yürüdür, Azərbaycanın yerləşdiyi coğrafiyada Rusiyaya düşmən bir çox dövlətin maraqları cəmləşib, Azərbaycan Rusiya ilə mehriban qonşuluq münasibətləri saxlayır. Bu qonşuluğa sədaqət Rusiya üçün çox əhəmiyyətli olmalıdır. Heç 2024-cü ilin 25 dekabrında vurulan təyyarəmizdə həlak olan 38 soydaşımızın qatili hələ tapılmayıb və azadlıqda gəzir. Rusiya bu hadisələrə düzgün qiymət verməli və bütün məsuliyyəti qəbul etməlidir”.
Ayhan
13:00 02.07.2025
Oxunuş sayı: 762
