ABŞ ordusu LASSO proqramı çərçivəsində 68 milyon dollarlıq gəzən sursat alışı planlaşdırır
ABŞ Müdafiə Nazirliyi 2026-cı il üçün hazırlanan müdafiə büdcəsi layihəsində LASSO (Low Altitude Stalking and Strike Ordnance) proqramı çərçivəsində gəzən sursatların alınmasına 68 milyon dollar vəsait ayırmağı planlaşdırır. Bu proqram ordunun modern döyüş şəraitinə uyğun sursat ehtiyatlarını artırmağı və texnoloji üstünlüyünü qorumağı hədəfləyir.
Crossmedia.az xarici mediaya istinadən bildirir ki, ayrılması nəzərdə tutulan bu məbləğ hesabına beş piyada briqadasının döyüş qruplarının ümumilikdə 294 ədəd Switchblade 600 tipli gəzən sursatla, 98 ədəd atəş idarəetmə sistemi ilə və digər müvafiq texniki komponentlərlə təchiz olunması nəzərdə tutulur. Bu addım ABŞ ordusunun çevik hücum imkanlarını gücləndirmək məqsədi daşıyır.
Qeyd edək ki, 2023-cü ilin dekabr ayından AeroVironment şirkəti ilə bağlanmış müqaviləyə əsasən artıq Switchblade 300 və 600 modellərinin tədarükünə başlanılıb. Lakin LASSO proqramı təkcə bu modellərlə məhdudlaşmır, daha geniş spektrli gəzən sursatların alınması və tətbiqini əhatə edir.
Bundan əlavə, proqram çərçivəsində sənaye bazasının müasirləşdirilməsi və sursat ehtiyatlarının formalaşdırılması üçün avadanlıq tədarükünə dair dörd yeni müqavilənin bağlanması da planlaşdırılır. Bunun üçün əlavə hüquqi və maliyyə səlahiyyətlərinin tətbiqi də gündəmdədir. ABŞ Müdafiə Nazirliyi bu proqram vasitəsilə texnoloji müharibə şəraitində effektivliyi artırmaq niyyətindədir.
Fatimə Nəbiyeva
11:22 02.07.2025
Oxunuş sayı: 925
