Tramp: Netanyahu ilə görüşdə İranın nüvə proqramının məhv edilməsini müzakirə edəcəyik
ABŞ prezidenti Donald Tramp İsrailin baş naziri Binyamin Netanyahunun ABŞ-yə səfəri zamanı İranın nüvə proqramının məhv edilməsinin gündəmə gələcəyini bildirib.
Crossmedia.az xarici mediaya istinadən bildirir ki, Tramp Florida ştatında tərəfdarları qarşısında çıxış edərkən bu məsələyə toxunub. O, qeyd edib ki, Netanyahu ilə görüş zamanı İran rejiminin nüvə ambisiyalarına son qoyulması məsələsi “qeyd ediləcək” və bu məsələ ABŞ üçün prioritetdir.
Donald Tramp həmçinin CNN telekanalını da tənqid edərək bildirib ki, media orqanı İrana qarşı hücumla bağlı saxta məlumat yaydığına görə hüquqi məsuliyyətə cəlb oluna bilər.
Tramp daha əvvəl verdiyi açıqlamalarda Ağ Evdə Netanyahu ilə keçirəcəyi görüşdə Qəzza zolağındakı vəziyyət və İranla bağlı “böyük uğurları” da müzakirə edəcəyini bildirmişdi.
İsrail mətbuatı Netanyahunun iyulun 6-da Vaşinqtonda Donald Trampla görüşəcəyini yazıb. Görüşün Ağ Evdə baş tutacağı gözlənilir.
Fatimə Nəbiyeva
00:47 02.07.2025
Oxunuş sayı: 7998
