Zohran Mamdaninin namizədliyi Demokratlar arasında parçalanma yaradıb
ABŞ-də Nyu-York şəhərinin meri vəzifəsinə Demokratların ilkin seçkilərində Zohran Mamdaninin gözlənilməz qələbəsi partiya daxilində ciddi narahatlıq yaradıb. Solçu və anti-İsrail mövqeləri ilə tanınan Mamdaninin qalib gəlməsi bir çox partiya nümayəndələrini çətin vəziyyətdə qoyub. Onlar ya bu “zəhərli brend” kimi qiymətləndirilən namizədi dəstəkləməli, ya da növbəti il özləri ön seçkilərdə solçu rəqiblərlə qarşılaşma riski ilə üz-üzə qala bilərlər.
Crossmedia.az xarici mediaya istinadən bildirir ki, Mamdaninin qalibiyyəti fonunda Konqresdəki Demokratlar, o cümlədən Den Qoldman, Cerri Nadler, Qreys Menq və Adriano Espaylat kimi nüfuzlu simalar, onun tərəfdarlarının özlərinə qarşı namizəd irəli sürməsindən ehtiyat edirlər. Partiya daxilindəki mənbələr bildirir ki, Demokratlar təkcə qubernator Keti Hoxulun aşağı reytinqindən deyil, eyni zamanda Mamdaninin şəhər ətrafında və qəsəbələrdə partiyaya vuracağı mənfi təsirdən də narahatdırlar.
Mamdaninin sosialist və radikal solçu mövqeləri onu təkcə şəhər daxilində deyil, şəhərdənkənar bölgələrdə də mübahisəli fiqura çevirib. Onun “qlobal intifadanı yaymaq” ifadəsini dəfələrlə pisləməkdən imtina etməsi partiya daxilində ciddi narazılıq yaradıb. Hətta Nümayəndələr Palatasında azlıq lideri Hekim Cefriz və Senatdakı Demokrat lider Çak Şumer də onu dəstəkləməkdən imtina ediblər. Senator Kirsten Gillibrand isə açıq şəkildə Mamdaninin bəzi fikirlərini tənqid edib və hələlik onu dəstəkləməyə hazır olmadığını deyib.
Bəzi Demokrat siyasətçilər, o cümlədən Tomas Suozzi və Laura Gillen kimi Long Island təmsilçiləri Mamdanini açıq şəkildə tənqid ediblər. Digər tərəfdən, bir sıra solçu siyasətçilər və təşkilatlar – o cümlədən Nyu-Yorkun baş prokuroru Letiţia Ceyms və Cerri Nadler – onu dəstəkləyiblər. Nyu-York Mərkəzi Əmək Şurası (AFL-CIO) isə Mamdanini rəsmən dəstəklədiyini açıqlayıb.
Siyasi müşahidəçilər isə xəbərdarlıq edirlər ki, Mamdaninin bəzi fikirləri Demokratları milli miqyasda zəiflədə bilər. Siyasi strateq Con Tomlin bildirib ki, onun bəzi açıqlamaları Respublikaçılar üçün fürsətə çevrilə bilər: “Onlar əvvəllər de Blazionu hədəf almışdılar, indi də eyni strategiyanı Mamdaniyə qarşı tətbiq edəcəklər və suburban seçiciləri Demokratlara qarşı çevirməyə çalışacaqlar".
Fatimə Nəbiyeva
05:16 02.07.2025
Oxunuş sayı: 5867
