Rubio Hind-Sakit okean tərəfdaşlarını qəbul edib: Məqsəd Çinə qarşı birgə fəaliyyətdir
ABŞ dövlət katibi Marko Rubio Avstraliya, Hindistan və Yaponiyadan olan həmkarlarını Vaşinqtonda qəbul edib. Görüş Quad formatında baş tutub və əsas məqsəd Çin təsirinə qarşı birgə strategiyanın müzakirəsi olub.
Crossmedia.az xarici mediaya istinadən bildirir ki, Quad ölkələri Çinlə bağlı ortaq narahatlıq paylaşsalar da, prezident Trampın tətbiq etdiyi qlobal tariflər tərəfdaşlıq münasibətlərində müəyyən gərginlik yaradıb.
Hindistanın xarici işlər naziri Subrahmanyam Jaishankar görüşü “çox məhsuldar” adlandırıb. Onun sözlərinə görə, bu toplantı Hind-Sakit okeanda strateji sabitliyi gücləndirəcək və regionun açıq qalmasını təmin edəcək.
Rubio Quad ölkələrini ABŞ üçün mühüm strateji tərəfdaşlar kimi təqdim edərək bildirib ki, konkret məsələlər üzrə artıq əməli addımların atılması zamanıdır. Bu çərçivədə 30-40 şirkətin iştirakı ilə kritik minerallar üzrə əməkdaşlıq məsələsi də müzakirəyə çıxarılıb.
Görüş Quad liderlərinin bu il Hindistanda keçirilməsi planlaşdırılan sammitinə hazırlıq məqsədi daşıyıb. Eyni zamanda, Rubio həmkarları ilə ayrıca ikitərəfli görüşlər də keçirib.
Fatimə Nəbiyeva
03:10 02.07.2025
Oxunuş sayı: 8212
