Belarusda siyasi müxalifətə qarşı təzyiqlər davam edir
Belarus hakimiyyəti bəzi siyasi məhbusları azad etməsinə baxmayaraq, müxalifətə qarşı repressiv siyasətini davam etdirir. “Vyasna” İnsan Hüquqları Mərkəzinin məlumatına görə, ötən ay hökumət 14 nəfəri əfv etsə də, eyni vaxtda ən azı 60 nəfər siyasi səbəblərlə saxlanılıb. Mərkəzin nümayəndəsi Pavel Sapelkanın sözlərinə görə, təkcə may ayında 100-dən çox siyasi tutma hadisəsi qeydə alınıb.
Crossmedia.az xarici mediaya istinadən bildirir ki, Sapelka, Belarus hakimiyyətinin cəmiyyətin bütün təbəqələrində qorxu mühiti yaratmağa çalışdığını bildirib: “Baskı silindiri dayanmır. Hakimiyyət Belarusda hər cür müxalif səsi boğmağa davam edir, yeni və rezonans doğuran cinayət işləri açılır. Belarusda heç kim özünü təhlükəsiz hiss etmir”.
2020-ci ildə Aleksandr Lukaşenkonun altıncı dəfə prezident seçilməsi ölkədə kütləvi etirazlara səbəb olmuşdu. Həm müxalifət, həm də Qərb dairələri bu seçkini saxtalaşdırılmış hesab etmişdi. On minlərlə insanın iştirak etdiyi etirazlara qarşı polis güc tətbiq etmiş, minlərlə nəfər saxlanılmış, bir çoxları isə ölkəni tərk etməyə məcbur olmuşdu.
Hazırda “Vyasna”nın məlumatına əsasən, Belarusda 1.174 siyasi məhbus var. Onların arasında 38 jurnalist və təşkilatın təsisçisi, Nobel Sülh Mükafatı laureatı Ales Belyatski də yer alır. Ən azı 8 siyasi məhbus həbsxanada həyatını itirib. Hakimiyyət son aylarda bir sıra məhbusları əfv etməklə Qərblə münasibətləri yumşaltmaq niyyəti güdür.
Bununla belə, hüquq müdafiəçiləri vəziyyətin dəyişmədiyini bildirirlər. Belarus ordusunu izləyən “Belaruski Hajun” qrupuna qarşı istintaq başladılıb və bu çərçivədə azı 20 nəfər saxlanılıb. Tanınmış müğənni Aleh Hamenka etiraz aksiyalarına qatıldığı üçün həbs edilib. Eyni zamanda, “Wardomacki” sosioloji laboratoriyasının əməkdaşları da hədəfə alınıb. BMT-nin Belarus üzrə xüsusi məruzəçisi Nils Muižnieks isə bildirib ki, rəsmi Minsk insan hüquqları ilə bağlı əməkdaşlıq təkliflərini nəzərə almır və vəziyyətdə heç bir müsbət dəyişiklik yoxdur.
Fatimə Nəbiyeva
02:05 02.07.2025
Oxunuş sayı: 6234
