İran yönümlü hakerlər Trampı hədəf alır: ABŞ-dan kibertəhlükə xəbərdarlığı
ABŞ rəsmiləri bildirir ki, İran yönümlü kiber qruplar Prezident Donald Trampa və onun komandasına aid olduğu iddia edilən elektron məktubları yaymaqla hədələyir. Federal qurumlar bu təşəbbüsü planlı şəkildə həyata keçirilən böhtan və nüfuzdan salma kampaniyası kimi qiymətləndirir.
Crossmedia.az xarici mediaya istinadən bildirir ki, ABŞ-nin İranın nüvə obyektlərinə endirdiyi zərbələrdən sonra, İrandan qaynaqlanan kiberhücumların artacağı gözlənilir. Rəsmilər belə hücumların ictimai xidmətlər, iqtisadi sistemlər və iri şirkətlər üçün təhlükə yarada biləcəyini bildirib.
ABŞ Kibertəhlükəsizlik və İnfrastruktur Təhlükəsizliyi Agentliyi (CISA) hədələrin yalnız rəqəmsal təbliğat olduğunu və məqsədin Trampla yanaşı digər federal rəsmiləri nüfuzdan salmaq olduğunu açıqlayıb. CISA-nın sözçüsü Marci MakKarti sosial şəbəkədə yazıb ki, düşmən qüvvələr təsdiqlənməmiş materiallardan istifadə edərək cəmiyyətdə çaşqınlıq və parçalanma yaratmağa çalışırlar.
Həmin hakerlər Trampın köməkçiləri, müşavirləri və Stormi Denielsə aid olduğu iddia edilən məktubların arxivini ələ keçirdiklərini deyiblər. Stormi Denielsə ödənilən “sus payı” vəsaiti Trampın sonradan cəzalanmasına səbəb olmuşdu.
ABŞ rəsmiləri xəbərdarlıq ediblər ki, İran yönümlü hakerlər yaxın vaxtlarda ictimai xidmətlərə, nəqliyyat sistemlərinə və müdafiə sənayesinə qarşı genişmiqyaslı hücumlar təşkil edə bilər. Agentliklər və təhlükəsizlik qurumları şirkətləri proqram təminatlarını yeniləməyə və güclü şifrə sistemləri tətbiq etməyə çağırıb.
Fatimə Nəbiyeva
09:38 02.07.2025
Oxunuş sayı: 7759
