Netanyahu Trampın qarşısında seçim qarşısında: Qəzzada atəşkəs, yoxsa müharibənin davamı?
İsrailin Baş naziri Benyamin Netanyahu ABŞ Prezidenti Donald Trampla 2025-ci ildə üçüncü dəfə görüşməyə hazırlaşır. Ağ Evdə keçiriləcək bu görüşdə əsas diqqət Qəzzadakı vəziyyətə yönələcək. Tramp bu həftə açıq şəkildə bildirib ki, “Biz gələn həftə atəşkəsin əldə olunmasını istəyirik” və əlavə edib: “Biz girovları geri qaytarmaq istəyirik”. Liderlərin gündəmində həm də ABŞ və İsrailin İranda həyata keçirdiyi hücumların nəticələri var.
Crossmedia.az xarici mediaya istinadən bildirir ki, Netanyahu bu həftə Qəzza ilə bağlı iki yüksək səviyyəli iclas keçirib, üçüncüsünün də cümə axşamı baş tutacağı gözlənilir. Ancaq İsrail hələlik Qəzzada hansı xətti izləyəcəyinə dair yekun qərar verməyib. Müzakirələrdə iki əsas variant yer alır: ya atəşkəs razılaşmasına getmək, ya da HƏMAS-a qarşı hərbi əməliyyatları gücləndirmək. Bildirilir ki, İsrail ordusu artıq HƏMAS-ın əsas rəhbərliyini sıradan çıxarıb və təşkilatın qüvvələri gizlənməyə məcbur qalıb.
İsrailin hərbi rəhbərliyi Qəzzadakı hərbi məqsədlərin tam həyata keçirilmədiyini etiraf etsə də, hazırkı mərhələdə diplomatik həll yolunun daha səmərəli ola biləcəyini düşünür. Ordu təmsilçiləri bildirirlər ki, HƏMAS-ın mövcud strukturlarını hədəf almaq çətinləşib və siyasi razılaşma alternativ çıxış yolu kimi dəyərləndirilə bilər.
Lakin Netanyahu hökumətində yer alan ifrat sağçı siyasətçilər əməliyyatların genişləndirilməsini tələb edirlər. Maliyyə naziri Bəzalel Smotriç bildirib: “Heç bir razılaşma, tərəfdaş, vasitəçi ola bilməz. Yeganə nəticə – HƏMAS-ın məhv edilməsi və girovların güc mövqeyindən geri qaytarılmasıdır”. Bununla yanaşı, bəzi nazirlər, xüsusən də Sosial rifah naziri Yaakov Marqi isə girovların azad olunmasını əsas prioritet kimi qiymətləndirir və danışıqlara başlamağın vacibliyini vurğulayır.
Hazırda İsrail ordusu Qəzzanın təxminən 60%-ni nəzarətdə saxlayır. Lakin atəşkəslə bağlı danışıqlar bir neçə həftədir çıxılmaz vəziyyətdədir. HƏMAS müharibənin daimi şəkildə bitirilməsini tələb edir, İsrail isə bu şərti qəbul etmir. Təhlükəsizlik üzrə sabiq general İsrail Ziv qeyd edir ki, Netanyahu iki yol ayrıcındadır: ya diplomatik yolla münaqişəni bitirib girovları azad etmək və bölgədə yeni razılaşmalara imza atmaq, ya da müharibəni davam etdirərək Qəzzanı tam ələ keçirmək.
Fatimə Nəbiyeva
23:50 01.07.2025
Oxunuş sayı: 6342
