ABŞ Suriyaya qarşı bir sıra sanksiyaları ləğv edib
ABŞ Prezidenti Donald Tramp Suriyaya qarşı bir çox iqtisadi sanksiyanı ləğv edən qərar imzalayıb. Bu qərar, 13 illik vətəndaş müharibəsindən sonra ölkənin bərpasına dəstək məqsədi daşıyır. Lakin müharibə cinayətlərində ittiham olunan Bəşər Əsəd, onun ailəsi və yüksək vəzifəli şəxslərə qarşı sanksiyalar qüvvədə qalır.
Crossmedia.az xarici mediaya istinadən bildirir ki, yeni qərar may ayında Ər-Riyadda Trampla Suriyanın keçici dövlət başçısı Əhməd aş-Şara arasında keçirilmiş görüşdə verilmiş vədlərin yerinə yetirilməsinə xidmət edir. Ağ Evin sözçüsü Karolin Leavitt bu addımın Suriyada sabitliyi və sülhü təşviq etməyə yönəldiyini deyib.
ABŞ Maliyyə Nazirliyinin nümayəndəsi Bred Smit qərarın beynəlxalq maliyyə sistemindən təcridin aradan qaldırılaraq investisiyalara şərait yaradacağını bildirib. Qərarla yanaşı, Corc Buş dövründə verilmiş və Suriyanın Livanı işğal etməsi ilə bağlı olan fövqəladə vəziyyət rejimi də ləğv olunub. Daha əvvəl qüvvədə olan beş fərman da qüvvədən düşüb.
Buna baxmayaraq, “Sezar Qanunu” çərçivəsində qəbul edilmiş və Suriya ordusu, kəşfiyyat və digər qurumlarla əməkdaşlıq edən şəxsləri hədəfə alan sanksiyalar hələ də qüvvədədir. Eyni zamanda, Captagon narkotik vasitəsinin istehsalı və satışı ilə məşğul olanlara qarşı tətbiq edilən sanksiyalar da davam edir.
Trampın qərarından sonra Avropa İttifaqı və Böyük Britaniya da Suriyaya qarşı bəzi sanksiyaları ləğv edib. Lakin ABŞ hələ də Suriyanı “terrorizmi dəstəkləyən dövlət” kimi tanıyır və aş-Şaranın rəhbərlik etdiyi “Heyət Təhrir əş-Şam” qruplaşmasını xarici terror təşkilatı kimi siyahıda saxlayır. Dövlət Departamenti bu təyinatların yenidən nəzərdən keçirildiyini açıqlayıb.
Fatimə Nəbiyeva
22:25 01.07.2025
Oxunuş sayı: 4285
