Kim Çen In Ukraynada həlak olan əsgərlərə vida etdi: Tabutları qucaqladı- FOTO
Kore Xalq Demokratik Respublikasının lideri Kim Çen In, Rusiyanın Ukrayna ilə apardığı müharibədə həlak olan Şimali Koreya əsgərləri üçün keçirilən vida mərasimində iştirak edib. O, tabutlara əllərini dayayaraq ehtiramla baş əyməklə diqqət çəkib.
Crossmedia.az xarici mediaya istinadən xəbər verir ki, bu görüntülər Şimali Koreya rejiminin ilk dəfə Ukraynada döyüş itkilərini açıq şəkildə qəbul etdiyini göstərən nadir anlardan biri kimi qiymətləndirilir. Keçən il imzalanan hərbi əməkdaşlıq sazişinin birinci ildönümünə həsr olunmuş təntənəli tədbirdə Şimali Koreyalı və rusiyalı sənətçilər birgə səhnə alıb.
Mərasim zamanı dövlət bayrağına bürünmüş altı tabutun qarşısında dayanan Kim Çen Inın görüntüləri ekranlarda nümayiş olunub. Eyni zamanda, Şimali Koreya və Rusiya hərbçilərinin bayraq yellədiyi səhnələrlə müşayiət edilən tabutların olduğu anlar geniş şəkildə təqdim edilib.
Rusiyanın Kursk vilayətindəki döyüş bölgəsindən alındığı iddia edilən qanlı bir dəftərdən səhifələr də göstərilib. Dəftərdə “Kritik an nəhayət gəldi” və “Əziz Ali Komandanımızın bizə bəxş etdiyi sonsuz sevgi və etibarla bu müqəddəs savaşı cəsarətlə davam etdirək” kimi cümlələr yer alıb.
Tabutların ölkəyə nə vaxt gətirildiyi dəqiq bilinmir. Ancaq mərasimdə Kim Çen In, bacısı Kim Yo-conq və Xarici işlər naziri Çoe Son-huinin qış geyimində olması vida mərasiminin bir neçə ay əvvəl baş tutduğu ehtimalını gücləndirir.
Şimali Koreya uzun müddət əsgərlərinin Rusiyaya göndərildiyini inkar edirdi. Lakin son təqdimatlarla rejim Ukraynadakı hərbi iştirakını “qəhrəmanlıq salnaməsi” kimi təqdim etməyə çalışır.
Məlumata görə, Şimali Koreya ötən payızdan bəri Ukraynaya təxminən 15 min hərbçi göndərib. Onlardan 4.700-nün yaralandığı, 600-nün isə həyatını itirdiyi qeyd olunur.
Bundan əlavə, Pxenyan Rusiyaya külli miqdarda sursat, artilleriya mərmiləri, ballistik raketlər və digər silahlar təhvil verib. Əvəzində isə Kremlin Şimali Koreyaya silah texnologiyası, peyk dəstəyi və iqtisadi yardım göstərdiyi bildirilir.
Mədinə Cəlilova
22:10 01.07.2025
Oxunuş sayı: 4092
