“Ukrayna Qəhrəmanı” İHA hücumlarından qoruyan yeni zirehli geyim hazırladı
Ukraynalı hərbçilər üçün hazırlanmış yeni zirehli hərbi geyim, şarapnel parçalarına qarşı davamlı olmaqla insansız hava vasitələrinin (İHA) yaratdığı təhlükələrə qarşı əlavə müdafiə təmin edəcək.
Ukraynanın ən çox medalla təltif edilmiş hərbçilərindən biri olan və qısa müddət əvvəl ölkənin ən yüksək hərbi fəxri adı — “Ukrayna Qəhrəmanı” unvanını alan mayor Oleh Şiryaiev, bu geyimi daha çox əsgərin həyatını xilas etmək məqsədilə hazırladığını bildirib.
Crossmedia.az xəbər verir ki, İngiltərənin “The Telegraph” nəşrinin məlumatına görə, geyim əsasən yarış avtomobillərinin təkərlərində istifadə olunan, yüksək temperaturadavamlı sintetik material olan kevlar və şarapnelin təsirini azaldan digər materialların kombinasiyasından hazırlanıb.
Kevlar mermilərə qarşı keramik plitələr qədər təsirli olmasa da, daha yüngüldür və İHA-ların geniş yayılması ilə döyüş meydanlarında əsas təhlükəyə çevrilən şarapnel parçalarına qarşı etibarlı müdafiə təmin edir.
Mayor Şiryaiev bildirib ki, yeni geyim bədən üçün maksimal qoruma təmin etməli və gücləndirilmiş dirsək, diz və topuq qoruyucuları da daxil edilməlidir. Dizaynerlər, eyni zamanda, döyüş şəraitində baş verə biləcək zərbələrə qarşı davamlı altlıqlara malik ayaqqabıların hazırlanması üzərində də işləyirlər.
Bununla belə, ordular hərəkət rahatlığına təsiri və yüksək temperatur səbəbindən ümumilikdə bomba zərərsizləşdirmə qrupları istisna olmaqla, tam zirehli geyimlərdən nadir hallarda istifadə edirlər. Rusiyanın xüsusi təyinatlı bölmələrinin də bəzən terror əməliyyatları zamanı qoruyucu geyimlərdən istifadə etdiyi qeyd olunur.
Mədinə Cəlilova
21:55 01.07.2025
Oxunuş sayı: 8412
