ABŞ-də 17 nəhəng kruiz gəmisində həyəcan: “Kruiz virusu” yayılır
ABŞ-də 2025-ci ilin ilk beş ayında azı 17 kruiz gəmisində xəstəlik epidemiyası qeydə alınıb. Norovirus minlərlə sərnişin və ekipaj üzvünü təsirləndirib, nəticədə gigiyena və qida təhlükəsizliyi qaydaları yenidən müzakirəyə çıxarılıb.
Crossmedia.az xəbər verir ki, bu barədə ABŞ mətbuatı xəbərdarlıq edib.
Hər il milyonlarla insan dincəlmək və istirahət üçün kruiz gəmilərinə üz tutur. Lakin bəzi gəmilərdə ciddi gigiyenik problemlərin mövcudluğu narahatlıq doğurur.
ABŞ Xəstəliklərə Nəzarət və Qarşısının Alınması Mərkəzləri (CDC) 2025-ci ilin yanvar-may aylarında ən azı 17 kruiz gəmisində yoluxucu xəstəlik baş verdiyini açıqlayıb.
Holland America, Princess Cruises, Viking və Cunard kimi tanınmış şirkətlərə məxsus gəmilər son aylarda yayılan infeksiyalardan təsirlənib. Bu vəziyyət gəmi içi gigiyena və qida təhlükəsizliyi protokollarına yenidən baxılması zərurətini gündəmə gətirib.
Kruiz gəmilərində tez-tez yayıldığı üçün “kruiz virusu” adlandırılan Norovirus, 13 hal üzrə əsas səbəb kimi müəyyən edilib. Bu epidemiyalarda ümumilikdə 1.568 sərnişin və ekipaj üzvü xəstələnib.
Norovirus yüksək yoluxuculuğa malik olub, qusma, ishal və qarın ağrıları kimi simptomlara səbəb olur.
Silversea Cruises şirkətinə məxsus Silver Ray gəmisində E. coli bakteriyası ilə bağlı bir epidemiya baş verib. Sea Cloud Spirit gəmisində isə tropik balıqlarda olan toksinlərin səbəb olduğu “siquatera” zəhərlənməsindən şübhələnilib.
CDC-yə görə, bir gəmidə sərnişin və ya ekipaj üzvlərinin ən azı 3%-i mədə-bağırsaq simptomları göstərirsə, bu vəziyyət “epidemiya” hesab olunur.
Bu cür hallar, ABŞ limanlarına yaxınlaşan gəmilərdə CDC-yə bağlı “Gəmi Sanitariya Proqramı” (VSP) tərəfindən izlənilir. Proqram su və qida təhlükəsizliyi, təmizlik, tullantı idarəsi və zərərvericilərlə mübarizə sahəsində nəzarət aparır.
Norovirusun xüsusilə qapalı məkanlarda tez yayılma xüsusiyyəti var. Virusa yoluxmuş əşyalarla təmas, xəstə heyətin hazırladığı qida və ya birbaşa əlaqə ilə asanlıqla keçə bilir. Virus bərk səthlərdə günlərlə aktiv qala bilir.
4 yanvar - 3 may tarixləri arasında ümumilikdə 10.748 sərnişindən 658-i, 4.172 ekipaj üzvündən 73-ü müxtəlif səfərlər zamanı virusa yoluxub.
CDC-nin məlumatına görə, hallarda ən çox rast gəlinən simptom ishal olub. Yoluxanların böyük əksəriyyətində Norovirusla əlaqəli qusma və ishal müşahidə edilib.
Mədinə Cəlilova
21:45 01.07.2025
Oxunuş sayı: 7228
