II Özbəkistan-Azərbaycan parlamentlərarası forumu 2026-cı ildə Azərbaycanda keçiriləcək
II Azərbaycan-Özbəkistan parlamentlərarası forumu 2026-cı ildə Azərbaycanda keçiriləcək.
Crossmedia.az-ın Özbəkistan Ali Məclisinin Senatına istinadən verdiyi məlumata görə, bu barədə Azərbaycan Milli Məclisinin sədri Sahibə Qafarova Xivədə mətbuat üçün brifinqdə bildirib.
Onun sözlərinə görə, forumun keçirilməsi Özbəkistanda hazırkı tədbirin yekunları üzrə imzalanmış 2025-2026-cı illər üçün parlamentlərarası əməkdaşlığın inkişafına dair yeni "yol xəritəsi"ndə nəzərdə tutulub. Sənəd ikitərəfli və çoxtərəfli tədbirlərin geniş dairəsini əhatə edir.
S.Qafarova vurğulayıb ki, hazırkı forum ikitərəfli münasibətlərin inkişafında mühüm mərhələdir və təkcə uğurlu parlamentlərarası əməkdaşlığı deyil, həm də iki ölkə xalqları arasında dostluq əlaqələrinin möhkəmlənməsini əks etdirir.
Cari forum çərçivəsində həmçinin Azərbaycan Milli Məclisi və Özbəkistan Ali Məclisi arasında əməkdaşlıq üzrə Parlamentlərarası komissiyanın reqlamenti imzalanıb. Bu da S.Qafarovanın sözlərinə görə, parlamentlər arasında qarşılıqlı fəaliyyətin səviyyəsini keyfiyyətcə yeni mərhələyə qaldıracaq və birgə layihələrin həyata keçirilməsi üçün daimi əsas təmin edəcək.
Milli Məclisin sədri forumların və parlamentlər arasında əməkdaşlığın hər iki ölkə xalqlarının rifahı naminə qarşılıqlı anlaşmanın daha da möhkəmlənməsinə və əlaqələrin inkişafına töhfə verəcəyinə əminliyini ifadə edib.
19:55 01.07.2025
Oxunuş sayı: 11174
