İran İsraillə müharibədə dəstəyinə görə Ermənistana təşəkkür etdi
İranın xarici işlər naziri Abbas Əraqçı İsrail və ABŞ-ın hücumlarından sonra Ermənistan XİN rəhbəri Ararat Mirzoyanla telefon danışığı aparıb.
Crossmedia.az xəbər verir ki, bu barədə İran XİN rəhbərinin “Telegram” kanalında məlumat verilib.
Telefon söhbətində tərəflər iki ölkə arasında münasibətlərin hazırkı vəziyyətini və regionda baş verən son prosesləri müzakirə ediblər.
Abbas Əraqçı söhbət zamanı ABŞ və “sionist rejimin” (İsrail) İranın milli suverenliyi və ərazi bütövlüyünə qarşı hücumlarına görə beynəlxalq ictimaiyyətin və BMT-nin məsuliyyət daşıdığını vurğulayıb. O, İran-Ermənistan münasibətlərindəki konstruktiv əməkdaşlığa və xüsusilə 12 günlük müharibə zamanı Ermənistanın tutduğu mövqeyə görə rəsmi Yerevana təşəkkürünü bildirib. Əraqçı həmçinin Ermənistanın iranlı vətəndaşlara konsulluq məsələlərində göstərdiyi dəstəyi yüksək qiymətləndirib.
Ermənistanın xarici işlər naziri Ararat Mirzoyan isə öz növbəsində ABŞ və İsrailin İrana qarşı hərbi əməliyyatlarını pisləyib və bölgədə sabitliyin təmin olunması üçün hərbi gərginliyin azaldılmasının vacibliyini qeyd edib.
Telefon danışığı regionda yaranmış yeni hərbi-siyasi vəziyyətdə Ermənistanın İranla həmrəylik nümayiş etdirdiyini bir daha göstərmiş oldu.
19:29 01.07.2025
Oxunuş sayı: 6135
