İtaliyada dəhşətli istilər: İki nəfər ölüb, 17 şəhərdə qırmızı xəbərdarlıq elan edilib
Avropada təsirini göstərən Afrika antisiklonu səbəbindən istilər pik həddə çatıb. Temperatur bəzi bölgələrdə 46 dərəcəyə qədər yüksəlib. İtaliya, İspaniya, Portuqaliya və Böyük Britaniyada həm istiyə, həm də orman yanğınlarına qarşı xəbərdarlıqlar edilib.
Crossmedia.az xarici mediaya istinadən bildirir ki, İtaliyada Frejus çayının daşması nəticəsində bir nəfər boğularaq ölüb. Bolonya yaxınlığında isə tikinti sahəsində çalışan 47 yaşlı şəxs beton tökülən zaman həyatını itirib. Bardonekkia şəhərində yağan güclü yağış Frejus çayının daşmasına və yolların palçıqla örtülməsinə səbəb olub. 70 yaşlı bir sakin maşından düşmək istədiyi zaman çaya düşərək boğulub.
İtaliya hökuməti əhalini və turistləri çay kənarlarından uzaq durmağa çağırıb. Ölkənin şimalındakı bir sıra bölgələrdə sarı xəbərdarlıq elan olunub, Florensiya, Bolonya və Torino da daxil olmaqla 17 şəhərdə isə qırmızı xəbərdarlıq qüvvədədir.
Aşırı isti səbəbindən bir çox bölgədə 31 avqusta qədər günün ən isti saatlarında açıq havada işləmək qadağan edilib. Qadağalar Roma daxil olmaqla Lazio, Basilicata, Siciliya, Apuliya, Umbriya, Toskana, Liguriya, Kampaniya və Kalabriya bölgələrində tətbiq olunur.
Lombardiyada isə yüksək riskli günlərdə inşaat, kənd təsərrüfatı və gülçülük kimi sahələrdə işlər dayandırılacaq. Bazar ertəsi Fransa və İtaliyada temperatur 40, İspaniya və Portuqaliyada isə 43 dərəcəni keçib. İspaniyanın Huelva şəhərində bazar günü qeydə alınan 46 dərəcə istilə rekord müəyyən olunub.
Fatimə Nəbiyeva
15:55 01.07.2025
Oxunuş sayı: 8024
