ABŞ Müdafiə şirkətləri İranın kiber hücum təhlükəsi altındadır – Agentliklər xəbərdarlıq edir
ABŞ-da İsraillə əməkdaşlıq edən müdafiə sənayesi şirkətləri İranın potensial kiber hücumları ilə üz-üzə qala bilər. ABŞ-ın Kibertəhlükəsizlik və İnfrastruktur Təhlükəsizliyi Agentliyi (CISA), Federal Təhqiqat Bürosu (FBI), Milli Təhlükəsizlik Agentliyi (NSA) və Müdafiə Nazirliyinin Kiber Cinayət Mərkəzi tərəfindən yayımlanan yeni xəbərdarlıqda bu təhlükəyə diqqət çəkilib.
Crossmedia.az xarici mediaya istinadən bildirir ki, xəbərdarlıqda “İndiki geosiyasi vəziyyəti nəzərə alaraq, İranla əlaqəli kiber aktorlar yaxın zamanda ABŞ cihazlarına və şəbəkələrinə hücum edə bilər” – deyə qeyd olunub.
Xüsusilə İsrailli tədqiqat və müdafiə firmaları ilə əməkdaşlıq edən və ya bu sahədə sərmayələri olan ABŞ müdafiə şirkətlərinin daha yüksək risk altında olduğu vurğulanıb.
Məlumata görə, İran 2023-cü ildə İsrailin təhsil və texnologiya sektorlarındakı qurumlara qarşı dağıdıcı kiber hücumlar həyata keçirməkdə şübhəli bilinir. Bu ayın əvvəlində isə İsrail tərəfdarı bir haker qrupu İranın ən böyük kriptovalyuta birjasından 90 milyon dollar oğurlayıb. Bu hücumun SEPAH (İslam İnqilabı Keşikçiləri Korpusu) ilə bağlı fəaliyyətlərə cavab olduğu iddia edilib.
Fidan Qarayeva
14:42 01.07.2025
Oxunuş sayı: 8071
