İran: ABŞ hərbi təhdidlərə son qoymadan nüvə danışıqları bərpa olunmayacaq
İranın xarici işlər naziri Abbas Əraqçi ABŞ-nin hərbi təhdidlərinə son qoymasını Vaşinqtonla Tehranın nüvə danışıqlarının yenidən başlanması üçün ilkin şərt hesab edir.
Crossmedia.az xarici mediaya istinadən bildirir ki, Abbas Əraqçi bəyan edib: “Əgər ABŞ hərbi təhdidlərə son qoymasa, İran və ABŞ arasında nüvə danışıqları bərpa olunmayacaq. Danışıqların yenidən başlayıb-başlamayacağına qərar vermək üçün əvvəlcə Vaşinqtonun bu prosesi hərbi təcavüz vasitəsi kimi istifadə etməyəcəyinə əmin olmalıyıq”.
Nazir əlavə edib ki, diplomatiya qapıları heç vaxt bağlanmayacaq.
Çıxışının başqa bir hissəsində İranın baş diplomatı uranın zənginləşdirilməsi sahəsini elmi əsaslara söykənən qabaqcıl bir istiqamət kimi xarakterizə edib.
Onun sözlərinə görə, bu sahəyə zərər vurulsa və ya o, tamamilə sıradan çıxsa belə, İran qısa zamanda itkiləri aradan qaldıraraq yenidən irəliləyiş əldə edə bilər: “Zənginləşdirmə texnologiyası və biliyi bombalanmaqla məhv edilə bilməz”.
Əraqçi əlavə edib ki, İranın dinc nüvə proqramı ölkə üçün milli qürur və ləyaqət mənbəyinə çevrilib.
Fatimə Nəbiyeva
12:05 01.07.2025
Oxunuş sayı: 6855
