ABŞ Suriyaya qarşı sanksiyaları ləğv edir: Yeni mərhələyə dəstək anons edildi
ABŞ dövlət katibi Marko Rubio Suriyaya qarşı tətbiq edilən sanksiyaların ləğv olunduğunu və bu ölkənin sabitliyini dəstəkləmək məqsədilə əlavə addımların atıldığını təsdiqləyib.
Crossmedia.az xarici mediaya istinadən bildirir ki, Marko Rubio bu barədə sosial şəbəkə platforması “X”də paylaşım edib. O qeyd edib ki, ABŞ prezidenti Donald Trampın Suriyaya qarşı sanksiyaların ləğv olunması ilə bağlı fərmanına uyğun olaraq, rəsmi Vaşinqton vahid, sabit və qonşuları ilə sülh şəraitində yaşayan bir Suriya üçün yeni təşəbbüslər irəli sürür.
“ABŞ-nin sanksiyaları artıq Suriyanın gələcəyinə maneə yaratmayacaq. Biz istəyirik ki, Suriya xalqı ayağa qalxaraq, münaqişə və ekstremizmdən uzaq, firavan bir gələcək qursun” - deyə Rubio bildirib.
Amerikalı diplomatın bu açıqlaması ABŞ-nin Yaxın Şərq siyasətində yeni mərhələyə qədəm qoyduğunu göstərir. Eyni zamanda, bu qərar regionda sabitliyin bərpasına töhfə verə biləcək mühüm siyasi siqnal kimi qiymətləndirilir.
Fidan Qarayeva
11:50 01.07.2025
Oxunuş sayı: 8317
