İlon Mask ABŞ-da yeni siyasi partiyanın yaradılmasını təklif edib
ABŞ-li biznesmen İlon Mask ölkədə yeni siyasi partiyanın yaradılmasının vaxtının çatdığını bəyan edib. O, ABŞ prezidenti Donald Trampın təşəbbüsü ilə hazırlanmış dövlət xərclərinin azaldılması barədə qanun layihəsini bir daha tənqid edib.
Crossmedia.az xarici mediaya istinadən bildirir ki, Mask sosial şəbəkə “X”də paylaşdığı açıqlamada bu qanun layihəsinə ayrılan vəsaiti “dəli xərclər” adlandırıb. O qeyd edib ki, “bu qanun layihəsi dövlət borcunun yuxarı həddini rekord səviyyədə – 5 trilyon dollar artırır və bu da göstərir ki, əslində biz birpartiyalı ölkədə yaşayırıq”.
Milyarder əlavə edib ki, artıq “insanlara həqiqətən önəm verən” yeni bir siyasi partiyanın yaranması zərurətə çevrilib. Onun sözlərinə görə, mövcud siyasi qüvvələr ölkə vətəndaşlarının maraqlarını lazımınca nəzərə almır.
Qeyd edək ki, İlon Mask daha əvvəl də Ağ Ev tərəfindən irəli sürülən dövlət xərclərinin azaldılması layihəsini tənqid etmişdi. Bu məsələyə görə, o, iyunun 5-də Donald Trampla sosial şəbəkələrdə qarşılıqlı sərt ifadələr mübadiləsi aparmışdı. Daha sonra Mask bəzi paylaşımlarına görə peşman olduğunu bildirmişdi. ABŞ prezidenti isə bildirib ki, Maskı bağışlaya bilər.
Fatimə Nəbiyeva
09:43 01.07.2025
Oxunuş sayı: 6093
