İran AEBA ilə əməkdaşlığı dayandırdı
İran parlamenti Atom Enerjisi üzrə Beynəlxalq Agentliklə (AEBA) əməkdaşlığı dayandıran qanun layihəsini təsdiqləyib.
Crossmedia.az xarici KİV-ə istinadən xəbər verir.
Qanun layihəsi bu gün parlamentin plenar iclasında qəbul edilib. İran parlamentinin Rəyasət Heyətinin üzvü Əlirza Səlimi bildirib ki, qərara əsasən, ölkənin nüvə obyektlərinin təhlükəsizliyi və dinc nüvə fəaliyyətlərinin təmin olunmadığı halda AEBA nümayəndələrinin İrana daxil olub yoxlamalar aparmasına icazə verilməyəcək. Qeyd olunur ki, bu qərar həmçinin İranın Ali Milli Təhlükəsizlik Şurasının razılığı ilə qüvvədə saxlanılacaq.
Qanunun qəbulundan dərhal sonra İran Atom Enerjisi Təşkilatı da AEBA ilə əməkdaşlığı rəsmi şəkildə dayandırdığını elan edib. Bu barədə parlament sədri Məhəmməd Baqir Qalibaf çıxış edərək bildirib ki, bundan sonra İranın dinc nüvə proqramı daha sürətlə inkişaf etdiriləcək.
“İran xalqının əzmkarlığını görən ABŞ isə şou xarakterli hücumlarla özünü çətin vəziyyətdən çıxarmağa çalışır”, – deyə Qalibaf qeyd edib.
Hazırda bu qərarın beynəlxalq səviyyədə hansı nəticələr doğuracağı və AEBA-nın cavab reaksiyası maraqla gözlənilir. Ekspertlər hesab edir ki, bu addım İranla Qərb arasında gərginliyi daha da artıracaq və yeni diplomatik böhrana yol aça bilər.
14:33 25.06.2025
Oxunuş sayı: 11741
