“Milli Qurtuluş Günü Azərbaycanın dövlətçilik tarixində dönüş nöqtəsidir”- DEPUTAT
15 İyun – Milli Qurtuluş Günü müasir Azərbaycanın tarixində dönüş nöqtəsi kimi qiymətləndirilir. Məhz bu gün ümummilli lider Heydər Əliyevin siyasi hakimiyyətə qayıdışı ilə ölkədə sabitlik və inkişafın əsası qoyuldu. Azərbaycanın parçalanmaq və vətəndaş qarşıdurması təhlükəsi ilə üzləşdiyi bir dövrdə bu dönüş xalqın xilası oldu. Bu gün ölkəmizin müstəqilliyinin möhkəmlənməsində xüsusi rol oynayan tarixi hadisə kimi qeyd olunur. Mövzu ilə bağlı Milli Məclisin deputatı Pərvanə Vəliyeva Crossmedia.az-a açıqlama verib.
Deputat Pərvanə Vəliyeva, 15 İyun – Milli Qurtuluş Gününün Azərbaycan xalqının müasir tarixində əsas dönüm nöqtələrindən biri, tarixi dövlətçiliyimizin xilası və müstəqilliyimizin möhkəmləndirilməsi baxımından əlamətdar bir gün olduğunu bildirərək başlayıb.
P.Vəliyevanın sözlərinə görə, bu tarix Ümummilli Lider Heydər Əliyevin Azərbaycan xalqının təkidi ilə yenidən siyasi hakimiyyətə qayıdışı ilə bağlıdır. O bildirib ki, bütün həyatını xalqına, vətəninə həsr etmiş müdrik dövlət xadimi Heydər Əliyevin adı tariximizə müstəqilliyimizin memarı, yeni Azərbaycanın banisi kimi yazılıb.
Deputatın fikrincə, 1991-ci ildə Azərbaycan müstəqilliyini bərpa etdikdən sonra ölkədə siyasi, iqtisadi və sosial sabitlik pozulmuşdu. 1992-1993-cü illərdə baş verən siyasi böhran, birinci Qarabağ müharibəsinin ağır gedişi, daxili çəkişmələr və dövlət idarəçiliyindəki səriştəsizlik ölkəni vətəndaş müharibəsi təhlükəsi ilə üz-üzə qoymuşdu.
P.Vəliyeva qeyd edib ki, 1993-cü ilin iyun ayında baş verən Gəncə qiyamı vəziyyəti daha da gərginləşdirmişdi. Onun sözlərinə görə, həmin dövrdə dövlətin müstəqilliyinə və suverenliyinə təhdid yaradan bütün amillər ölkəmizdə yaşanırdı və artıq həyatın bütün sahələrini böhran bürümüşdü. Dövlət əmlakının açıq-aşkar mənimsənilməsi halları kütləvi xarakter daşıyırdı.
Deputat bildirib ki, belə bir vəziyyətdən çıxış yolunu axtaran Azərbaycan xalqı xilasını yalnız Heydər Əliyevin simasında görürdü.
Pərvanə Vəliyevanın sözlərinə görə, bu çətin və ziddiyyətli şəraitdə xalqın israrlı tələbi ilə o dövrdə Naxçıvan Muxtar Respublikası Ali Məclisinin sədri olan Heydər Əliyev Bakıya dəvət olundu. Onun güclü nüfuzu, qətiyyətli siyasəti və Azərbaycan xalqının əzmi sayəsində bütün məkrli planların qarşısı alındı və haqsızlıqlara son qoyuldu.
Deputat vurğulayıb ki, 15 iyun 1993-cü ildə Heydər Əliyev Azərbaycan Respublikası Ali Sovetinin sədri seçildi. Bu hadisə Azərbaycanın dövlətçilik tarixində dönüş nöqtəsi oldu və sonradan Milli Qurtuluş Günü kimi tarixə düşdü.
Pərvanə Vəliyeva əlavə edib ki, 1993-cü il iyunun 24-də Milli Şuranın qərarı ilə Azərbaycan Respublikası Prezidentinin səlahiyyətləri Ali Sovetin sədri Heydər Əliyevə verildi və həmin ilin oktyabrında xalq öz siyasi iradəsini ifadə edərək onu Prezident seçdi.
Deputatın sözlərinə görə, Ulu Öndərin rəhbərliyə qayıdışı ölkədə siyasi sabitliyin təmin olunmasında, iqtisadi islahatların başlanmasında və dövlətçiliyin möhkəmlənməsində əsas rol oynayıb. Heydər Əliyevin siyasi iradəsi, dövlətçilik təcrübəsi və xalqın etimadı sayəsində ölkədə siyasi sabitlik tam bərpa olunub, müstəqilliyin möhkəmləndirilməsi istiqamətində ciddi addımlar atılıb.
P.Vəliyeva vurğulayıb ki, Ümummilli Liderin təşəbbüsü ilə ölkəmizin xarici siyasət strategiyası müəyyənləşdirilib və bu strategiya Azərbaycanın beynəlxalq aləmdə tanınmasına və nüfuz qazanmasına səbəb olub.
Deputat qeyd edib ki, Ulu Öndər ölkədə vətəndaş həmrəyliyini, sabitliyi son dərəcə vacib sayır və bu fikri xüsusi vurğulayırdı: “Əgər respublikada ictimai-siyasi sabitlik olmasa, sağlam ictimai-siyasi mühit olmasa, heç bir sosial-iqtisadi proqramdan, yaxud problemlərin həll edilməsindən söhbət gedə bilməz".
Pərvanə Vəliyevanın fikrincə, 1993-2003-cü illərdə Azərbaycanın sürətli inkişafı bugünkü reallıqların əsasını təşkil edir. Həmin illərdə görülmüş işlər nəticəsində Azərbaycan inkişaf yoluna qədəm qoyub, beynəlxalq aləmdə prinsipial mövqe nümayiş etdirib və dünyada böyük hörmət qazanıb.
Deputat bildirib ki, Ulu Öndərin ordu quruculuğu istiqamətində başladığı işlər və müəyyənləşdirdiyi strategiya nəticəsində bu gün Azərbaycan Silahlı Qüvvələri dünyanın ən güclü 50 ordusu sırasındadır.
P.Vəliyeva əlavə edib ki, Ümummilli Liderin ən böyük arzusu Azərbaycanı bütöv görmək idi. Bu arzu 27 ildən sonra Prezident İlham Əliyevin qətiyyətli siyasəti sayəsində gerçəkləşdi.
Deputat vurğulayıb: “Xalqımızın 44 günlük Vətən müharibəsində qazandığı möhtəşəm Zəfər Ulu Öndər Heydər Əliyevin siyasi kursunun uğurlu davamının nəticəsidir".
Pərvanə Vəliyeva bildirib ki, bu gün Prezident, Müzəffər Ali Baş Komandan İlham Əliyev azad edilmiş torpaqlarda infrastruktur layihələrinin təməlini qoyur, Böyük Qayıdışın reallaşdırılması istiqamətində təxirəsalınmaz tədbirlər həyata keçirir.
Sonda o qeyd edib ki, dövlət başçısının apardığı uğurlu siyasət nəticəsində Azərbaycan dünyanın dinamik inkişaf edən, modernləşən və beynəlxalq miqyasda nüfuzu artan ölkəsinə çevrilib.
Fatimə Nəbiyeva
11:40 12.06.2025
Oxunuş sayı: 1595
