Ekspert: Azərbaycan hərbçiləri Əfqanıstanda mühüm humanitar missiyanı yerinə yetiriblər
Azərbaycan hərbçilərinin beynəlxalq əməliyyatlarda, xüsusilə də Əfqanıstandakı xidmətlərində göstərdiyi fəaliyyət təkcə hərbi deyil, həm də diplomatik əhəmiyyət daşıyır. Bu fəaliyyət Azərbaycan ordusunun regionda və beynəlxalq müstəvidə etibarlı tərəfdaş olduğunu bir daha nümayiş etdirir.
Son günlər amerikalı senatorun çıxışı ilə gündəmə gələn bu məsələ ölkəmizin beynəlxalq arenadakı nüfuzunun artması baxımından mühüm əhəmiyyət kəsb edir. Senatorun “Azərbaycanlı hərbçilər Əfqanıstandan mülki və hərbi şəxslərin təxliyəsində mühüm rol oynayıb” fikri, ölkəmizin sülh və təhlükəsizlik istiqamətində atdığı addımların qlobal səviyyədə tanındığını göstərir.
Mövzu ilə bağlı Crossmedia.az-a açıqlama verən hərbi ekspert Şair Ramaldanov qeyd edib ki, Azərbaycan hərbçiləri Əfqanıstanda fəaliyyət göstərən koalisiya qüvvələrinin tərkibində etibarlı şəkildə xidmət aparıblar.
Şair Ramaldanov bildirib ki, Azərbaycan hərbçiləri Əfqanıstanda Türkiyə Silahlı Qüvvələrinin tərkibində humanitar və təhlükəsizlik yönümlü tapşırıqları yerinə yetiriblər. Ekspertin sözlərinə görə, həmin missiya çərçivəsində Azərbaycan kontingentinin sayı artırılmış və hərbçilərimiz öz öhdəliklərini peşəkarlıqla icra etmişlər: “Azərbaycan heyəti humanitar və təhlükəsizlik tapşırıqlarını yüksək səviyyədə yerinə yetirməklə nümunəvi xidmət göstərib”.
Ekspert qeyd edib ki, Əfqanıstan rəhbərliyi də Azərbaycan hərbçilərinin xidmətini yüksək qiymətləndirib. Onun sözlərinə görə, bu cür beynəlxalq missiyalarda iştirak ölkəmizin diplomatik əlaqələrinin gücləndirilməsi üçün də əhəmiyyətlidir: “Azərbaycan hərbçilərinin Əfqanıstandakı fəaliyyəti təkcə hərbi yox, eyni zamanda siyasi və diplomatik üstünlük yaradır”.
Şair Ramaldanov hesab edir ki, bu faktlar Ermənistanın Azərbaycana qarşı apardığı mənfi təbliğatın neytrallaşdırılması və Azərbaycanın qlobal miqyasda sülhə töhfə verən dövlət kimi tanınması üçün ciddi əsaslar yaradır.
Zəhra Ağayeva
16:25 29.05.2025
Oxunuş sayı: 781
