“Beynəlxalq təşkilatlar Ermənistanın mina cinayətlərinə laqeyd münasibət göstərir” – Deputat
Kəlbəcər rayonunun İstisu yaşayış məntəqəsi istiqamətində Azərbaycan Ordusunun mühəndis-istehkam bölmələrinin mina və partlamamış döyüş sursatlarından əraziləri təmizləməsi zamanı hərbi qulluqçumuz – Sadıqov Xudaverdi Həsən oğlu – ermənilər tərəfindən basdırılmış piyada əleyhinə minaya düşüb. Nəticədə o, sol ayağından xəsarət alıb.
“Dərhal ilkin tibbi yardım göstərilən hərbi qulluqçumuz ixtisaslı müayinə və müalicə üçün yaxınlıqdakı hərbi hospitala təxliyə olunub”, – bu barədə Müdafiə Nazirliyi məlumat yayıb.
Azərbaycanın işğaldan azad olunmuş ərazilərində mina təhlükəsi hələ də aktuallığını qoruyur. Bu gün baş verən mina partlayışı nəticəsində bir hərbçimizin yaralanması cəmiyyətdə haqlı narahatlıq doğurub. Bu kimi hadisələr Ermənistanın mina təhdidini davam etdirdiyini, sülhə mane olan əsas faktorlardan birinin məhz bu məsələ olduğunu bir daha göstərir. Minalanmış ərazilərin xəritələrinin verilməməsi, beynəlxalq hüququn kobud şəkildə pozulması və insan həyatına təhlükə yaradılması ictimaiyyətdə ciddi narazılıqla qarşılanır.
Bu barədə Deputat Asim Mollazadə də məsələyə münasibət bildirərək Crossmedia.az-a açıqlama verib. O, beynəlxalq təşkilatların Ermənistanın mina cinayətlərinə və ümumilikdə hərbi cinayətlərinə qarşı göstərdiyi laqeyd münasibəti kəskin tənqid edib.
Asim Mollazadənin sözlərinə görə, Ermənistanın törətdiyi cinayətlərə qarşı ədalətli mövqe sərgilənmir. Deputat qeyd edib ki, bu susqunluğun arxasında siyasi korrupsiya və bəzi təşkilatların erməni diasporu ilə bağlılığı dayanır: “Çox təəssüf ki, beynəlxalq təşkilatlar bu cinayətlərə görə Ermənistanı günahlandırmır”.
Deputat vurğulayıb ki, Ermənistanın bir milyondan artıq mina basdırmasına baxmayaraq, mina xəritələrini təqdim etməməsi beynəlxalq hüquqa ziddir. Onun sözlərinə görə, bu minaların qurbanları beynəlxalq təşkilatların gözü qarşısında olsa da, heç bir ciddi reaksiya verilmir: “Minaların qurbanları beynəlxalq təşkilatların gözü qarşısında olmalıdır”.
Asim Mollazadə əlavə edib ki, Azərbaycan bu istiqamətdə müvafiq sənədləri beynəlxalq qurumlara təqdim etməli, informasiya müharibəsində fəallığını artırmalıdır. O bildirib ki, bu sahədə də Azərbaycan qalib gəlməli, hərbi cinayətkarlar isə tribunallar vasitəsilə cəzalandırılmalıdır.
Deputat qeyd edib ki, hazırda Azərbaycanda bu cinayətlərlə bağlı məhkəmə prosesi aparılır və hər bir cinayətkarın günahı sübuta yetiriləcək. O ümid etdiyini bildirib ki, gələcəkdə Koçaryan və Sarkisyan kimi digər məsul şəxslər də törətdikləri cinayətlərə görə cavab verməli olacaqlar.
Zəhra Ağayeva
15:31 29.05.2025
Oxunuş sayı: 5502
