Özbəkistanın Kokand Dövlət Universitetində Azərbaycan dili tədris olunacaq
Özbəkistandakı səfirliyimizin nəzdində fəaliyyət göstərən Heydər Əliyev adına Azərbaycan Mədəniyyət Mərkəzinin təşəbbüsü ilə Kokand Dövlət Universiteti ilə həmkarlıq çərçivəsində növbəti tədris ilindən etibarən sözügedən ali təhsil müəssisəsində Azərbaycan dilinin tədrisi təşkil ediləcək.
Bu barədə Crossmedia.az Azərbaycan Mədəniyyət Mərkəzinə istinadən xəbər verir.
Bildirilib ki, məsələ ilə bağlı Azərbaycan Mədəniyyət Mərkəzinin direktoru Akif Marifli ilə Kokand Dövlət Universitetinin rektoru Dilnoza Xocayeva arasında keçirilən görüşdə razılığa gəlinib.
Görüş əsnasında Özbəkistanda Azərbaycan mədəniyyətinin təbliği sahəsində sözügedən universitetlə əməkdaşlıq məsələləri müzakirə edilib. Müzakirələr zamanı Azərbaycan Mədəniyyət Mərkəzinin təşəbbüsü və təklifi ilə Kokand Dövlət Universitetində Azərbaycan dilinin, ədəbiyyatının və tarixinin tədrisi məsələsi irəli sürülüb və bu təklif universitet rəhbərliyi tərəfindən müsbət qarşılanıb.
Təklifə əsasən bu ilin sentyabr ayından etibarən Kokand Dövlət Universitetində ilkin olaraq Azərbaycan dilinin tədrisinə başlanılması razılığı əldə edilib və mühazirələr universitetdə yeni yaradılmış Seyid Əzim Şirvani adına Azərbaycanşünaslıq mərkəzində aparılacaq.
Məlumat üçün bildirmək istəyirik ki, Özbəkistanın köklü ali təhsil ocaqlarından biri hesab edilən Kokand Dövlət Universiteti 1930-ci ildə yaradılıb və Fərqanə vilayətinin aparıcı ali təhsil ocaqlarından biridir. Universitetdə 20 mindən çox tələbə təhsil alır.
21:36 22.05.2025
Oxunuş sayı: 790
