TƏBİB: Aprel ayında vətəndaşlara 9 milyona yaxın tibbi xidmət göstərilib
Tibbi Ərazi Bölmələrini İdarəetmə Birliyinin (TƏBİB) tabeliyində fəaliyyət göstərən tibb müəssisələrində 2025-ci ilin aprel ayı ərzində ümumilikdə 2 milyon 464 min 844 müraciət qeydə alınıb. Bunlardan 48 min 114-ü stasionar, 2 milyon 416 min 730-u ambulator olub. 2024-cü ilin eyni dövrü ilə müqayisədə müraciətlərin ümumi sayında 14 faiz artım qeydə alınıb.
Crossmedia.az bu barədə TƏBİB-ə istinadən məlumat verir.
Məlumata görə, aprel ayında göstərilən xidmət sayında da ötən ilin eyni dövrü ilə müqayisədə artım müşahidə olunub. Belə ki, aprel ayı ərzində 8 milyon 815 min 400 (1 milyon 27 min 233 stasionar, 7 milyon 788 min 167 ambulator olmaqla) tibbi xidmət göstərilib. Tibb müəssisələrində göstərilən xidmətlərin ümumi sayı ötən ilin eyni dövrü ilə müqayisədə 23 faiz artıb.
Tibb müəssisələri üzrə vətəndaşlara göstərilən laborator xidmətlərdə də artım qeydə alınıb. Aprel ayı ərzində 3 milyon 765 min 965 sayda laborator müayinələr aparılıb ki, onların da 505 min 42-si stasionar, 3 milyon 260 min 923-ü ambulator olub. Beləliklə, tibb müəssisələrində göstərilən laborator xidmətlərin ümumi sayında 2024-cü illə müqayisədə 27 faiz artım qeydə alınıb.
Ay ərzində cərrahi əməliyyat və prosedurların sayı isə 33 min 937 (31 min 397 stasionar, 2 min 540 ambulator olmaqla) olub. Ötən ilin müvafiq dövrü ilə müqayisədə əməliyyat və prosedurların sayında 1 faiz artım qeydə alınıb.
10:15 22.05.2025
Oxunuş sayı: 9605
