Gözlər Asiyada! - Nüvə savaşı başlayır?
Mayın yeddisində Hindiastan və Pakistan arasında son illərin ən böyük hava döyüşü baş verib. Hadisə mayın 7-nə keçən gecə baş verib. Məlumata görə, döyüşdə hər iki tərəfdən ümumilikdə 125 qırıcı təyyarə iştirak edib. Hindistan tərəfinin hücumu zamanı Pakistan HHQ beş Hindistan qırıcısını və bir PUA-nı vurub.
Məlum olduğu kimi, tərəflər arasında gərginlik davam edir. Toqquşmanın davam etməsi nüvə müharibəsini də yenidən aktuallaşdırır.
Davam edən gərginlik barədə Crossmedia.az-a danışan politoloq Məhəmməd Əsədullzadə qeyd edib ki, son illərdə Hindistan iqtisadiyyatında müşahidə olunan irəliləyişlərin, hərbi-texniki sahədə inkişaf və regional geosiyasi şərtlərinin dəyişməsinin Baş nazir Narendra Modinin rəhbərlik etdiyi millətçi hökumətin ölkəni daha da gücləndirmək və regional güc statusu əldə etmək istiqamətində addımlar atmasına şərait yaratdığını bildirib: " Bu çərçivədə Hindistanın Pakistana qarşı müəyyən hərbi müdaxilə ilə siyasi və hərbi üstünlük əldə etmək cəhdləri diqqət çəkir. Hindistanın planlaşdırdığı ehtimal edilən "terror təxribatı"nın məsuliyyətinin Pakistanın üzərinə atılması və bunun fonunda hərbi əməliyyatlara start verilməsi, Hindistanın Pakistan üzərində qələbə qazanmaq istəyi ilə izah oluna bilər".
Politoloq Hindistanın qarşıdurmanın genişmiqyaslı müharibəyə çevrilməsini istəmədiyini vurğulayıb: "Çünki Pakistanın da nüvə silahlarına sahib olması bu riski artırır. Hindistan düşünürdü ki, zərbə endirəcək, lakin Pakistan buna cavab verməyəcək. Əksinə, baş verənlər göstərdi ki, Pakistan güclü cavab verməklə hərbi, siyasi və psixoloji üstünlük əldə etdi. Beş qırıcının vurulması, bəzilərinin qəzaya uğraması Pakistanın Hindistan üzərində psixoloji üstünlük qazandığını göstərir. Bu üstünlük təkcə qırıcıların döyüşə cəlb olunması ilə deyil, həm də Pakistan pilotlarının peşəkarlığı ilə bağlıdır. Qeyd olunur ki, Pakistan Hərbi Hava Qüvvələrinin pilotları çeviklik və manevr qabiliyyəti baxımından üstün xüsusiyyətlərə malikdir və döyüş şəraitində yüksək bacarıqla qırıcıları idarə edə bilirlər".
Sonda M. Əsədullazadə bütün bu hadisələr fonunda Hindistan-Pakistan münaqişəsinin genişmiqyaslı müharibəyə çevriləcəyi ehtimalının zəif olduğunu qeyd edib: "Çox güman ki, lokal hərbi tədbirlərlə tərəflər daxili ictimaiyyəti sakitləşdirməyə çalışacaq. Bununla belə, beynəlxalq siyasi şərtlər daim dəyişir və proseslər yeni risklərlə müşayiət olunur. Gələcək mərhələdə bu münaqişənin dondurulması ehtimalı mövcud olsa da, sülh müqaviləsinin imzalanması vacibdir. Həmçinin uzunmüddətli perspektivdə genişmiqyaslı müharibə ehtimalını da tamamilə istisna etmək olmaz".
Pərvin Hacıyeva
15:28 08.05.2025
Oxunuş sayı: 13152
