Dəməşqdə druz icması Suriya hökumətinə ağır silahları təhvil verməyə başlayıb
Suriya paytaxtı Dəməşqdə yerləşən druz icması ölkənin Daxili İşlər Nazirliyinə ağır silahların təhvil verilməsinə başlayıb. Bu addım, əvvəlki razılaşma çərçivəsində atılıb və ölkədə sabitliyin bərpasına yönəlib.
Crossmedia.az xarici mediaya istinadən bildirir ki, silahların təhvil verilməsi prosesi mayın 1-dən başlayıb. Razılaşmaya əsasən, druz icması münaqişə zonalarında istifadə edilən ağır silahları könüllü şəkildə Suriya hökumətinə təslim edir.
Bu təşəbbüs, ölkədə uzun illərdir davam edən vətəndaş qarşıdurmalarının azaldılması, silahlı qrupların neytrallaşdırılması və dövlət orqanlarının nəzarətinin bərpası baxımından mühüm addım hesab olunur. Hökumət rəsmiləri bu prosesi “milli barışığın və təhlükəsizliyin gücləndirilməsi” istiqamətində önəmli mərhələ adlandırıblar.
Druz icmasının nümayəndələri də bildiriblər ki, bu razılaşma icma daxilində sabitliyin qorunmasına, dinc həyat tərzinin bərpasına və hökumət strukturları ilə əlaqələrin yaxşılaşdırılmasına xidmət edir. Onlar bu qərarın həm icma üzvlərinin, həm də ölkənin gələcəyi üçün əhəmiyyətli olduğunu vurğulayıblar.
Prosesin mərhələli şəkildə davam edəcəyi, digər bölgələrdəki druz icmalarının da bu razılaşmaya qoşulacağı gözlənilir. Hökumət və yerli nümayəndələr arasında dialoqun davam etdirilməsi planlaşdırılır.
Fatimə Nəbiyeva
08:03 06.05.2025
Oxunuş sayı: 9196
