Mirandolinanın qisası – səhnədə Qoldoni incəliyi
Milli Gənc Tamaşaçılar Teatrının səhnəsində əsrarəngiz bir komediya canlandı. Karlo Qoldoninin məşhur “Mehmanxana sahibəsi” əsəri Azərbaycan teatr səhnəsinə klassikanın zərif nəfəsini gətirdi. Crossmedia.az xəbər verir ki, Xalq artisti Cənnət Səlimovanın quruluş verdiyi tamaşa gülüş və düşündürücü sükut arasında incə bir sərhəd yaratdı.
Tamaşaçını qarşılayan Mirandolina təkcə mehmanxana sahibəsi deyil, həm də zəkası, mədəniyyəti və qadın qüruru ilə güclü bir obraz idi. Leyli Vəliyevanın ifasında bu obraz zərif ironiyası və emosional dərinliyi ilə tamaşa salonunu ovsunladı. Mirandolina nəinki müştərilərini hörmətlə qarşılayan sahibə idi, həm də qadın təhqirinə cavab verə biləcək qədər güclü və inadkar idi.
Tamaşada komik çalarlar Kavaler obrazı üzərindən gərgin bir qürur savaşına çevrilirdi. Şövqi Hüseynovun ifasında qadınlara qarşı laqeyd və özünü “toxunulmaz” sayan bir kişi obrazı, Mirandolinanın zəkalı qisası qarşısında gülünc və aciz göründü. Hüseynovun səhnədəki enerjisi tamaşa boyu gülüşlərə səbəb olurdu.
Onların qarşıdurmasına isə ətrafdakı kişi obrazları, markiz-Elşən Hacıbabayev, qraf-Rəşad Səfərov və lakey Fabrisionun-Nofəl Vəliyev rəngarəng yanaşmaları əlavə edilirdi. Rəşad Səfərovun aristokrat ədaları, Nofəl Vəliyevin sadəlövh, amma təmkinli ifası tamaşaya əlavə yumor qatırdı. Hər biri Qoldoninin burjua cəmiyyətinə yönəltdiyi tənqidi güzgü kimi çıxış edirdi.
Əlbəttə, bu teatr gecəsində ən çox yadda qalan məqamlardan biri də iki aktrisanın – Sevinc Əziz-Ortenziya və Gülər Nəbiyevanın-Deyanira yaratdığı komik situasiyalar idi. Onların varlığı Mirandolinanın qadın obrazını tamamlayır, səhnəyə həyatın özü kimi rəng qatırdı. Kavalerin nökəri rolunda Anar Səfiyev səhnəyə zarafat dolu sükutla daxil olub, incə mimikaları və sərrast oyun tərzi ilə tamaşanın yumor qatını gözəgörünməz bir əl kimi tamamladı.
“Mehmanxana sahibəsi” iki hissəli, ancaq təəssüratları uzun müddət yadda qalan tamaşadır. İtalyan komediyasının klassik ahəngi, Azərbaycan teatrının peşəkarlığı ilə birləşərək, bu axşamı sadəcə gülüş deyil, həm də düşüncə ilə müşayiət olunan bir teatra çevirdi.
Səhnə pərdəsi bağlansa da, Mirandolinanın zəkası və qadın gücünün incə təbəssümü uzun müddət tamaşaçıların qəlbində qalacaq...
Ayan Sədi
07:55 06.05.2025
Oxunuş sayı: 7534
