Hindistan Baş naziri və Rusiya Prezidenti arasında telefon danışığı baş tutub
Hindistanın Baş naziri Narendra Modi ilə Rusiya Federasiyasının Prezidenti Vladimir Putin arasında bu gün telefon danışığı baş tutub.
Crossmedia.az xarici mediaya istinadən xəbər verir ki, Baş nazir Modi Prezident Putini Qələbə Gününün 80 illiyi münasibətilə təbrik edib, ona səmimi salamlarını çatdırıb və bu ilin sonunda Hindistanda keçiriləcək ikitərəfli sammitdə iştirak etməyə dəvət edib.
Telefon danışığı zamanı Prezident Putin Cammu və Kəşmirin Pahalqam bölgəsində törədilmiş terror aktını qətiyyətlə pisləyib və Hindistan xalqına başsağlığı verib.
Hər iki lider regional və beynəlxalq məsələlər üzrə dialoqun davam etdirilməsinin vacibliyini vurğulayıb və strateji tərəfdaşlıq çərçivəsində əməkdaşlığın dərinləşdirilməsinə sadiqliklərini ifadə ediblər.
Mədinə Cəlilova
22:33 05.05.2025
Oxunuş sayı: 10185
