Ukrayna Silahlı Qüvvələri Kursk vilayətində hücuma cəhd edib
Ukrayna Silahlı Qüvvələri (USQ) bu gecə Kursk vilayətində yerləşən Tyotkino yaşayış məntəqəsi istiqamətində növbəti hücum cəhdi həyata keçirib.
Crossmedia.az Rusiya Müdafiə Nazirliyinin məlumatına istinadən xəbər verir ki, USQ gecə saatlarında bölgədəki körpülərə raket zərbələri endirib və səhər saatlarında zirehli texnikanın müşayiəti ilə hücuma keçib.
İlkin məlumata əsasən, minatəmizləyən texnika mina sahələrində keçidlər açmağa cəhd göstərib. Daha sonra zirehli maşınlarla əsgərlər hücuma qoşulublar. Rusiya Silahlı Qüvvələrinin paraşütçü bölmələri də daxil olmaqla bir neçə hissəsi əraziyə cəlb olunub və düşmən hücumunun qarşısının alınması istiqamətində tədbirlər görülür.
Müdafiə Nazirliyi bildirib ki, hücum zamanı Ukrayna texnikasının bir hissəsi məhv edilib, döyüşlər hazırda sərhəd yaxınlığında davam edir. Ukrayna qüvvələrinin cəbhə boyunca irəlilədiyinə dair məlumatlar yoxlanılır.
Bundan əlavə, Ukrayna ordusu Kursk vilayətinin digər istiqamətlərində də fəallıq nümayiş etdirib. USQ-nin Novı Put və Qluşkovski rayonu (Tyotkinodan şərqdə) istiqamətlərində də hücum hazırlığı müşahidə olunub. Pis hava şəraitindən istifadə edən Ukrayna qüvvələri burada da minalanmış ərazilərdən keçmək üçün texnika cəlb edib.
Rusiya Silahlı Qüvvələri bölgədə vəziyyətə tam nəzarət etdiyini və təhlükənin qarşısının alınması üçün bütün zəruri tədbirlərin görüldüyünü bildirir.
Mədinə Cəlilova
19:10 05.05.2025
Oxunuş sayı: 745
