Ərdoğan: “İsrail beynəlxalq hüquqa ən böyük təhdiddir”
Türkiyə Prezidenti Rəcəb Tayyib Ərdoğan İsrailin beynəlxalq hüquqa ciddi şəkildə zidd davrandığını bildirib. O, bu fikirləri Şimali Kipr Türk Respublikasından qayıdarkən təyyarədə jurnalistlərin suallarını cavablandırarkən səsləndirib.
Crossmedia.az xarici mediaya istinadən bildirir ki, dövlət başçısı İsrailin artıq beynəlxalq hüququ pozmağı adət halına gətirdiyini deyib. Ərdoğanın sözlərinə görə, Tel-Əviv rəhbərliyi beynəlxalq normalara və insan haqlarına qarşı çıxmaqda davam edir.
Türkiyə lideri vurğulayıb ki, İsrailin hərbi güc və bombalarla fələstinliləri məğlub edə bilmədiyi üçün indi onları ərzaq və dərmandan məhrum etməyə çalışır. O, bu vəziyyəti insanlıq əleyhinə bir cinayət kimi qiymətləndirib və beynəlxalq ictimaiyyəti bu haqsızlığa qarşı reaksiya verməyə çağırıb.
Ərdoğan həmçinin bildirib ki, bölgədə sabitliyin təmin olunması üçün ilk növbədə İsrailin bu siyasətinə son qoyulmalı, Fələstin xalqının hüquqları tanınmalı və qorunmalıdır. O, Türkiyənin Fələstinə dəstəyinin davam edəcəyini bir daha vurğulayıb.
Türkiyə prezidenti daha əvvəl də İsrailin Qəzzadakı əməliyyatlarını sərt şəkildə tənqid etmiş, bölgədəki humanitar böhranın səbəbkarı kimi İsrail hakimiyyətini göstərmişdi.
Fatimə Nəbiyeva
18:48 05.05.2025
Oxunuş sayı: 11932
