Husilər İsrailə uçuş edən ölkələri hədələdi: “Aeroportlara zərbələr endiriləcək”
Yəməndəki husilərin nümayəndəsi Yəhya Sari beynəlxalq aviaşirkətləri İsrailə planlaşdırılan bütün uçuşları ləğv etməyə çağırıb. O bildirib ki, İsrailə qarşı hərtərəfli hava blokadası tətbiq etmək məqsədilə hava limanlarına təkrar-təkrar zərbələr endirilməsi planlaşdırılır.
Crossmedia.az xarici mediaya istinadən bildirir ki, husilər bu xəbərdarlığı “öz təyyarələrinin təhlükəsizliyini qorumaq istəyən” ölkələrə ünvanlayıb. Onlar İsrail hava limanlarına ediləcək hücumların Yəmən ərazisindən həyata keçiriləcəyini və bu hücumların intensiv xarakter daşıyacağını vurğulayıblar.
Yəhya Sari çıxışında deyib ki, İsrailin Qəzzadakı hərbi əməliyyatlarına cavab olaraq bu addımlar atılır və məqsəd bölgədə İsrailin hava yollarını tam şəkildə iflic etməkdir. O qeyd edib ki, hücumlar yalnız İsrailə aid obyektlərlə məhdudlaşmayacaq, ora uçan beynəlxalq reyslər də təhlükə altına düşə bilər.
Husilərin bu bəyanatı beynəlxalq ictimaiyyətdə narahatlıq yaradıb. Bir sıra aviaşirkətlərin Yaxın Şərqdəki marşrutlarını yenidən gözdən keçirdiyi bildirilir. Təhlükəsizlik riski səbəbindən bölgəyə uçuşların məhdudlaşdırılması və ya tamamilə dayandırılması ehtimalı müzakirə olunur.
Ekspertlər hesab edir ki, bu cür təhdidlər hava nəqliyyatına ciddi təsir göstərə bilər və regional sabitliyi daha da pozar. Hələlik İsrail və beynəlxalq aviasiya qurumları məsələ ilə bağlı rəsmi açıqlama verməyiblər.
Fatimə Nəbiyeva
18:35 05.05.2025
Oxunuş sayı: 8414
